الداعى 6-شى جۇڭگو حالىقارالىق يمپورتتىق كورمەسىنە شانحاي قالاسىندا قازاقستاننان 25 ازىق-تۇلىك ەكسپورتتاۋشى كومپانيا قاتىسادى.
بيىل وتاندىق تاۋار وندىرۋشىلەر «ازىق-تۇلىك جانە اۋىل شارۋاشىلىعى ونەركاسىبى» سەكتورىنداعى ستەندتە ازىق-تۇلىك پەن اۋىل شارۋاشىلىعى تاۋارلارىنىڭ 30-دان استام اتاۋىن ۇسىنادى، دەپ حابارلايدى Almaty-akshamy.kz
جۇڭگو حالىقارالىق يمپورتتىق ەكسپو (China International Import Expo) 5-10 قاراشا ارالىعىندا قحر، شانحاي قالاسىندا وتەدى. قازاقستاندىق ەكسپورتقا باعدارلانعان كاسىپورىنداردى ىرىكتەۋدى ق ر ساۋدا جانە ينتەگراسيا مينيسترلىگىنىڭ كەلىسىمى بويىنشا Qaztrade مەملەكەتتىك قولداۋ شارالارىنىڭ وپەراتورى جۇرگىزدى.
كورمەگە قاتىسۋعا تىركەلۋ 2023 جىلدىڭ 10-27 شىلدەسى ارالىعىندا اشىلدى. تىركەۋدىڭ اشىلۋى تۋرالى اقپارات جەرگىلىكتى اتقارۋشى ورگاندارعا، «اتامەكەن» ق ر ۇلتتىق كاسىپكەرلەر پالاتاسىنا (ونىڭ ىشىندە وكپ)، «KazakhExport» اق-نا جىبەرىلدى، سونداي-اق جەدەلحات-ارنالاردا ورنالاستىرىلدى
ۇمىتكەرلەردى ىرىكتەۋ بەلگىلى ءبىر تالاپتارعا سايكەس ءوتىنىش بەرە العان كومپانيالار اراسىندا جۇرگىزىلدى.
«ماسەلەن، كومپانيا قازاقستان اۋماعىندا كاسىپكەرلىك سۋبەكتىسى رەتىندە تىركەلۋى ءتيىس، ول وندىرەتىن ءونىم نەمەسە قىزمەت جۇڭگو نارىعىندا تالاپ ەتىلۋى ءتيىس. بۇل رەتتە ونىمدەردىڭ نەمەسە قىزمەتتەردىڭ ساپاسى مىندەتتى تۇردە ق ر قاۋىپسىزدىك ستاندارتتارىنىڭ تالاپتارىنا جانە حالىقارالىق ستاندارتتارعا سايكەس كەلۋى قاجەت»، - دەپ حابارلادى QazTrade.
باسقا كريتەرييلەردىڭ قاتارىنا كاسىپورىننىڭ قولدانىستاعى زاڭناماعا سايكەس سالىقتاردى، الىمداردى جانە باسقا دا مىندەتتى تولەمدەردى تولەۋ بويىنشا بەرەشەگىنىڭ بولماۋى جاتادى.
«كومپانيانىڭ رەسمي سايتىنىڭ نەمەسە الەۋمەتتىك جەلىلەردەگى پاراقتىڭ بولۋى دا ماڭىزدى، ساپالى كونتەنت – تاۋاردىڭ فوتو-بەينە سيپاتتاماسى، پرەزەنتاسيا، ءونىم كاتالوگى اعىلشىن تىلىندە، ونىڭ ىشىندە. ءبىز ءتىپتى كومپانيادا اعىلشىن ءتىلىن جاقسى مەڭگەرگەن جەكە شتاتتىق قىزمەتكەردىڭ بولۋىنا نازار اۋدارامىز. بۇل شەتەلدىك سەرىكتەستەرمەن ىسكەرلىك حات الماسۋ جانە كەلىسسوزدەر جۇرگىزۋ ءۇشىن ماڭىزدى»، - دەپ اتاپ ءوتتى QazTrade.
كاسىپكەرلەردىڭ جۇڭگو اۋماعىنداعى ءىس-شارالارعا قاتىسۋى ءۇشىن ولاردىڭ قحر باس كەدەن باسقارماسى جۇيەسىندە اككرەديتتەلۋى تالاپ ەتىلەدى. ۆەتەريناريالىق جانە فيتوسانيتاريالىق باقىلاۋعا جاتاتىن تاۋارلار اسىرەسە مۇقيات قاراستىرىلادى. بۇل قحر-نىڭ ۇلتتىق زاڭناماسىنا بايلانىستى، ول تاماق ونىمدەرىن، سونىڭ ىشىندە سۋسىنداردى وندىرەتىن جانە ساقتايتىن بارلىق كاسىپورىندار تىركەلىپ، قىتايدىڭ CIFER تىركەۋ جۇيەسىنە ەنگىزىلۋى كەرەك دەپ رەتتەيدى.
قازاقستان جۇڭگو ەكسپو-عا 2018 جىلى جۇمىسىن باستاعان ساتتەن باستاپ قاتىسادى. بەس جىل ىشىندە 133 قازاقستاندىق كومپانيا قىتايلىق ساتىپ الۋشىعا ءوز تاۋارلارى مەن قىزمەتتەرىن كورسەتە الدى، سونداي-اق 260 ملن دوللاردان اساتىن سوماعا ەكسپورتتىق كەلىسىمشارتتار جاساستى.