كادەتتەر اراسىندا تاەكۆوندودان الەم چەمپيوناتىنىڭ ەكىنشى كۇنىنىڭ قورىتىندىسى بويىنشا قازاقستاندىق سپورتشىلار 2 التىن، 3 كۇمىس جانە 1 قولا مەدال جەڭىپ الدى، دەپ حابارلادى Almaty-akshamy.kz turkystan.kz-كە سىلتەمە جاساپ.
مادەنيەت جانە سپورت مينيسترلىگىنىڭ مالىمەتىنشە، بوسنيا مەن گەرسەگوۆينانىڭ استاناسى سارايەۆو قالاسىندا كادەتتەر اراسىندا تاەكۆوندودان الەم چەمپيوناتى ءوتىپ جاتىر.
ەكىنشى جارىس كۇنىنىڭ قورىتىندىسى بويىنشا قازاقستان كومانداسى 6 مەدال جەڭىپ الدى: 2 التىن، 3 كۇمىس جانە 1 قولا. باۋىرجان يسامەدين (كاتەگورياسى 164 سم-گە دەيىن) جانە تايسيا بوروۆيكوۆا (164 سم) التىن مەدال الدى.
كۇمىس جۇلدەگەرلەر – نۇرپەرزەنت سامات ۇلى (160 سم)، نازەركە جاڭابەرگەن (144 سم) جانە ادىلەت شەرى (156 سم).
قولا جۇلدەنى دىنمۇحامەد تولىباي (152 سم) جەڭىپ الدى. الەم چەمپيوناتى 31 تامىزدا اياقتالادى.
«جەتكىنشىكتەرىمىزدى الەمدىك بىرىنشىلىكتە تابىستى ونەر كورسەتۋىمەن قۇتتىقتايمىن، بۇل – وتە جاقسى ناتيجە. سپورتشىلاردى دايارلاۋمەن اينالىسقان جاتتىقتىرۋشىلاردىڭ جۇمىسىن ەرەكشە اتاپ وتكىم كەلەدى، الداعى جارىس كۇندەرىندە دە ەلىمىزدىڭ قۇراماسىنا ساتتىلىك تىلەيمىن»، – دەپ اتاپ ءوتتى مسم سپورت كوميتەتىنىڭ ءتوراعاسى ەربول مىرزابوسىنوۆ.