قازاقستاندىق سۋرەتشىنىڭ ەڭبەكتەرى فرانسيا جۇرتشىلىعىنا ۇسىنىلدى

ەرەكشە تالانت يەسىنىڭ كورمەسى پاريجدەگى قازاقستان ەلشىلىگىندە، فرانسيا سەناتى مەن ستراسبۋرگتەگى ەۋروپا كەڭەسىندە ءوتتى.

كارىپبەك كۇيىكوۆ سەمەي پوليگونىنان ءجۇز شاقىرىمداي جەردە ورنالاسقان ەگىندىبۇلاق اۋىلىندا دۇنيەگە كەلگەن. ەكى قولى جوق ازامات ءوز تۋىندىلارىن تىسپەن، كەيدە باشپايلارىمەن سالادى. سۋرەتتەرى ارقىلى ول اجداھا قارۋدان ازات بولۋدى، قازاقستاننىڭ انتيادرولىق ۇستانىمىن ناسيحاتتاپ ءجۇر، دەپ حابارلايدى Almaty-akshamy.kz.

كارىپبەكتىڭ فرانسياعا ساپارى مەن كورمەسىن ۇيىمداستىرۋ ءۇشىن، وسى ەلدەگى قازاقستاندىقتار قارجىلاي قولداۋ كورسەتكەن. 

«كورمە مەنىڭ جان دۇنيەمدى ءدۇر سىلكىندىردى. يادرولىق ءقاۋىپ ماسەلەسى ءقازىر وتە وزەكتى. يادرولىق سىناقتىڭ زاردابى وسىنشا اۋىر بولاتىنىن، حالىققا قانداي قاسىرەت اكەلەتىنىن ويلانبايمىز. بۇل كورمە ادامزاتتى ىزگى ويلارعا جەتەلەيدى دەگەن ۇمىتتەمىن»، - دەيدى كورمەگە كەلۋشى بريس ماسسەكس.

«سۋرەتتەر قاتتى تولقىتتى. ءپوزيتيۆتى كورىنىستەر، جانىڭدى جادىراتقانمەن، بومبا، قيراعان، قاسىرەت شەككەن ازاماتتاردىڭ بەينەسى كوڭىلىڭدى قۇلازىتادى. الەمدە تەك بەيبىتشىلىك بولسىنشى»، - دەيدى كورمەگە كەلۋشى ەسما شامساني.