ەكى جاقتى كەلىسىم اياسىندا قازاقستاندا College Contributor initiative پيلوتتىق باعدارلاماسى ىسكە قوسىلدى
قازاقستاندىق ستۋدەنتتەر Amazon كورپوراسياسىنىڭ اۋقىمدى حالىقارالىق جوباسىمەن جۇمىس ىستەۋگە مۇمكىندىك الدى. OpenSearch Amazon جوباسى عىلىم جانە جوعارى ءبىلىم مينيسترلىگى مەن Amazon كومپانياسى اراسىنداعى مەموراندۋم اياسىندا جۇزەگە اسادى، دەپ حابارلايدى Almaty-akshamy.kz.
2022 جىلدىڭ سوڭىندا عىلىم جانە جوعارى ءبىلىم مينيسترلىگى مەن Amazon كومپانياسى اراسىندا جوعارى ءبىلىم بەرۋ سالاسىنداعى پەرسپەكتيۆالىق ىنتىماقتاستىق، ستۋدەنتتەردىڭ وقۋ پروسەسىندە يننوۆاسيالاردى ەنگىزۋ جانە مانسابىن باستاۋ ءۇشىن قاجەتتى داعدىلاردى يگەرۋ مۇمكىندىكتەرىن كەڭەيتۋ تۋرالى مەموراندۋمعا قول قويىلعان بولاتىن.
ەكى جاقتى كەلىسىم اياسىندا قازاقستاندا College Contributor initiative پيلوتتىق باعدارلاماسى ىسكە قوسىلدى. ەندى ەلىمىزدىڭ جوو ستۋدەنتتەرى Amazon كومپانياسىنىڭ حالىقارالىق اۋديتورياسى اراسىندا ءبىرىنشى بولىپ OpenSearch Amazon اشىق باستاپقى كودى بار جوبامەن جۇمىس ىستەۋگە قاتىسادى.
ەلىمىزدەگى تەحنيكالىق ۋنيۆەرسيتەتتەردە وقيتىن 100-دەن استام ۇزدىك ستۋدەنت Amazon كورپوراسياسىنىڭ الدىڭعى قاتارلى جوباسىنا تىكەلەي قاتىسۋعا مۇمكىندىك الادى. اقپاراتتىق تەحنولوگيالار ماماندىعىندا ءبىلىم الاتىن قازاقستاندىق ستۋدەنتتەر ءۇش اي بويى Amazon كومپانياسى ماماندارىنىڭ جەتەكشىلىگىمەن OpenSearch بويىنشا تاجىريبەلىك جۇمىستار جۇرگىزىپ، دەرەكتەر رەپوزيتورييلەرىنىڭ كەڭ باعىتى بويىنشا باستاپقى كودقا وزگەرىستەر مەن جاقسارتۋلار ەنگىزەدى.
باعدارلاما ستۋدەنتتەردىڭ ءوز پورتفوليوسىنا حالىقارالىق جوبالاردا جۇمىس ىستەۋ بويىنشا ترەك رەكوردىن (باسقارۋ ناتيجەلەرىن) جاساۋعا، Amazon كومپانياسىنىڭ ماماندارىمەن ءتيىمدى بايلانىس ورناتۋعا مۇمكىندىك بەرەدى.
OpenSearch جوباسى اياسىندا ستۋدەنتتەرگە ءوز جۇمىستارىنا تولىق تالداۋ تۇرىندەگى ەسەپ بەرىلەدى. سونداي-اق، كورپوراسيا تالىمگەرلەرىنەن ۇسىنىمدار مەن پىكىرلەر تىڭداپ، بولاشاقتا Amazon كومپانياسىندا تاعىلىمدامادان وتۋگە، ءتىپتى جۇمىسقا ورنالاسۋعا مۇمكىندىك الادى.
بۇدان بولەك، Amazon كومپانياسى OpenSearch Amazon پيلوتتىق جوباسىن قازاقستاندا ىسكە اسىرۋ ارقىلى باسقا ەلدەردەن ستۋدەنتتەر تارتىپ، ءورىسىن كەڭەيتۋگە نيەتتى.