قازاقستان كومانداسى Google Solution Challenge دەپ اتالاتىن الەمدىك حاكاتوندا ۇزدىك وندىققا ەندى.
نازاربايەۆ ۋنيۆەرسيتەتى مەن قازاقستان-بريتان تەحنيكالىق ۋنيۆەرسيتەتىنىڭ ستۋدەنتتەرى ءموبيلدى قوسىمشا ويلاپ شىعاردى. بۇل اعزاسىن اۋىستارعان، ياعني ترانسپلانتاسيا جاسالعان ادامدارعا ارنالعان، دەپ حابارلايدى Almaty-akshamy.kz 24.kz-كە سىلتەمە جاساپ.
قوسىمشا ناۋقاستاردىڭ فيزيكالىق قانا ەمەس، كوڭىل-كۇيىن قالپىنا كەلتىرۋگە كومەكتەسەدى. دارى-دارمەكتى ۋاقىتىمەن ءىشىپ، تۇراقتى تۇردە جاتتىعۋ جاساۋ قاجەت. وعان قوسا ءاردايىم دارىگەرمەن بايلانىستا بولعانى ءجون. بۇل ترانسپلانتاسيا جاسالعان ناۋقاستارعا قويىلاتىن باستى تالاپ. وسى ايتىلعانداردى ءوزىمىزدىڭ ستۋدەنتتەر ازىرلەگەن ReVita ءموبيلدى قوسىمشاسى ارقىلى باقىلاۋعا بولادى. قوسىمشاعا ەلەكتروندىق پوشتانى ەنگىزىپ، جەكە كابينەت اشىپ، مەديسينالىق دەرەكتەرىن تىركەسە بولعانى. كورسەتكىش سمارت ساعات نەمەسە سمارت ساقينا ارقىلى وقىلادى. سودان كەيىن اۆتوماتتى تۇردە ەمدەۋشى دارىگەرگە بەرىلەدى. بۇل جوبانىڭ ەرەكشەلىگى سول ناۋقاس ەمحاناعا بارماي-اق، ءوزىنىڭ دەنساۋلىعىنا قاتىستى دەرەكتەردى قوسىمشادان باقىلاپ وتىرادى.
«ونىڭ تاعى دا بىرنەشە قوسىمشا قىزمەتى بار. ياعني، وسى قوسىمشانى قولدانعان ادامعا سپورتپەن قالاي دۇرىس اينالىسۋعا بولاتىنىنا دەيىن كەڭەس بەرەدى. ياعني، سول جەردە ەمدەلۋشىلەردىڭ ءوزارا پىكىر الماسىپ، بىر-بىرىمەن سويلەسە الادى»، - دەدى قبتۋ 3 كۋرس ستۋدەنتى اڭسار سەرىكبايەۆ.
جوبا اۆتورلارىنىڭ ايتۋىنشا، دايىندىق جۇمىستارىنىڭ وزىنە ءبىراز ۋاقىت جۇمساعان. ترانسپلانتاسيا جاسايتىن ورتالىق ماماندارىمەن كەڭەسىپ، ونداعى ناۋقاستارمەن سويلەسكەن.
«جىلدىڭ سوڭىنا دەيىن باعدارلامانى تولىقتىرا كەلە ون شاقتى ادامعا بەرگىمىز كەلەدى. وسى ون شاقتى ادام ءبىزدىڭ باقىلاۋ الاڭىمىز بولادى. باقىلاۋدان وتكەننەن كەيىن ءبىز تاعى قوسىمشا ازىرلەمە جۇمىستارىن وتكىزەمىز. الدىمەن پاسيەنتتەرگە جابىق الفا جانە بەتا تەستىلەۋ وتكىزىلەدى. سودان كەيىن نارىقتىق وسىنداي پلاتفورما ەنگىزىلەدى. ياعني ءارتۇرلى كلينيكالار، دارىگەرلەر ءبىزدىڭ باعدارلامامىزدى وزدەرىنىڭ ناۋقاستارىنا ۇسىنا الاتىن بولادى»، - دەيدى نازاربايەۆ ۋنيۆەرسيتەتىنىڭ 3 كۋرس ستۋدەنتى ماديار مولدابايەۆ.
ءقازىر قوسىمشانى جەتىلدىرۋ جۇمىستارىمەن جەتى ادام اينالىسىپ جاتىر. ولار حاكاتون اياسىنان شىعىپ، وعان جاساندى ينتەللەكتكە نەگىزدەلگەن كەڭ فۋنكسيونالدى قوسۋدى كوزدەيدى. ول ناۋقاستىڭ تاعى قانداي قوسىمشا اۋرۋى بار ەكەنىن جانە ونىڭ قاشان بەلگى بەرەتىنىن بولجاي الادى.