كەيىنگى جىلى قازاقستانداعى جىلىجايلار الاڭى 18،1%-عا قىسقاردى.
جالپى ەلىمىزدە كوكونىس، كوشەت پەن گۇل وسىرۋگە ارنالعان 1،5 مىڭ گەكتارعا جۋىق جىلىجاي اۋماعى بار. دەگەنمەن ءىس جۇزىندە ونىڭ تەك 1،2 مىڭ گەكتارى عانا قولدانىلىپ وتىر. ال قالعان 270،5 گەكتار ماقساتتى پايلانىلماي كەلەدى، دەپ حابارلايدى Almaty-akshamy.kz.
Energyprom.kz مالىمەتىنشە، بۇل جاعداي جىلىجايدان الىناتىن كوكونىستەر كولەمىنىڭ تومەندەۋىنە سەبەپ بولىپ وتىر. بىلتىر فەرمەرلەر جابىق جەردە وسىرىلگەن 182،4 مىڭ توننا قيار مەن قىزاناق جينادى. ال 2021 جىلى جىلىجايدان الىنعان ءونىم 256،5 مىڭ توننا بولعان ەدى. ياعني، كورسەتكىشتەر ۇشتەن بىرىنە تومەندەگەن.
ىشكى نارىققا شىعارىلاتىن جىلىجاي كوكونىستەرىنىڭ باسىم بولىگى ەلىمىزدىڭ وڭتۇستىك ايماقتارىنان جەتكىزىلەدى. ويتكەنى، كليماتى قاتال سولتۇستىك پەن شىعىسقا قاراعاندا مۇندا ءونىم وسىرۋگە جۇمسالاتىن شىعىن از. ماسەلەن، تۇركىستان، الماتى، جامبىل وبلىستارى مەن شىمكەنت قالاسى قازاقستاندىق بازارلار مەن دۇكەندەردىڭ سورەلەرىنە بارلىق جىلىجاي كوكونىستەرىنىڭ 76،3% جەتكىزەدى. بۇل رەتتە تۇركىستان وبلىسىنىڭ فەرمەرلەرى كوش باستاپ تۇر.
ال باعاعا كەلەتىن بولساق، جىلىجاي كوكونىستەرىنىڭ قۇنى ازىق-تۇلىك ينفلياسياسىنىڭ كورسەتكىشىنەن ەداۋىر اسىپ تۇسەدى. ماسەلەن، سۇرانىس جوعارى جەلتوقساننان ناۋرىزعا دەيىنگى ارالىقتا بۇل ءونىمنىڭ كەلىسى 957-دەن 1244 تەڭگەگە دەيىن كوتەرىلەدى. ياعني، ءوسىم 47،5%-56،8% ارالىعىندا.
ماۋسىمارالىق كەزەڭدە قىزاناقتىڭ باعاسى دا ءبىر كەلىسىنە 1 000 تەڭگەدەن استى. دەگەنمەن قيارمەن سالىستىرعاندا بۇل ءونىم ارزان. اتاپ ايتقاندا، قىزاناقتىڭ قۇنى شامامەن 20%-32%-عا ءوستى.