قازاقستاندىق ماماندار ونەركاسىپ سالاسىندا دەرەكتەردى وڭدەيتىن بىرەگەي پلاتفورما ازىرلەدى.
جۇيە تاۋ-كەن مەتاللۋرگيا، مۇناي-گاز جانە وڭدەۋ سەكتورلارىندا جۇمىس ىستەيتىن كاسىپورىندارداعى وندىرىستىك جانە بيزنەس-پروسەستەردى وڭتايلاندىرادى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ول قاراپايىم قۇرالداردىڭ كومەگىمەن دەرەكتەردى جيناپ قانا قويماي، تالداۋ جۇرگىزۋگە دە مۇمكىندىك بەرەدى. سونىمەن قاتار پلاتفورما شيكىزات پەن ەنەرگيا رەسۋرستارىنىڭ ازايۋى مەن ارتىق قولدانىلۋىن انىقتايدى. ال ءوندىرۋشى وسى قۇرىلعى ارقىلى ءوندىرىس كەزىندە ورىن العان بارلىق كەمشىلىكتەر مەن قاتەلىكتەردى بايقاي الادى.
«ءبىز وندىرىستىك كاسىپورىنداردىڭ جۇمىسىن وڭتايلاندىرۋ ءۇشىن جاساندى ينتەللەكت ەلەمەنتتەرىن پايدالانامىز. كومپانيا ءوز جۇمىسىن باستاعانىنا شامامەن 4 جىل بولدى. قازاقستاندا 10-عا جۋىق جوبانى، ءىرى ۇيىمدارمەن بايلانىسى بار جوبالاردى جۇزەگە اسىردىق. ءوزىمىزدىڭ بارلىق جوبالارىمىزدا ءبىز سيفرلىق جۇيەلەردىڭ، باعدارلامالاردىڭ تيىمدىلىگىن بارىنشا كورسەتۋگە تىرىستىق»، - دەدى IT-شەشىمدەر بويىنشا قازاقستاندىق كومپانيانىڭ باسشىسى ەرجان جانزاقوۆ.
كومپانيا ءوز مۇمكىندىگىن وتكەن جىلى يننوۆاسيالىق گرانتتار بايقاۋىنداعى جەڭىسىنىڭ ارقاسىندا كەڭەيتكەنىن ايتا كەتكەن ءجون. اتالعان بايقاۋدىڭ جەڭىمپازدارعا قويعان ەڭ نەگىزگى شارتتارىنىڭ ءبىرى جوبالارى «نوۋ-حاۋ» ۇعىمىنا ساي بولۋ ەدى. سونىڭ ناتيجەسىندە بۇگىندە كومپانيا كورشى مەملەكەتتەردىڭ نارىعىنا شىعۋعا دايىن.
«قازاقستان ءۇشىن مۇنداي ونىمدەردىڭ بەرەرى وتە كوپ. مىسالى، باسقا ەلدەرگە وسىنداي ونىمدەردى ەكسپورتتاۋ مۇمكىندىگى. ال گرانتتىق قارجىلاندىرۋعا كەلەر بولساق، ول QazInnovations تاراپىنان شامامەن 40 ميلليون بولدى، ال قوسا قارجىلاندىرۋ ناتيجەسىندە جالپى 55 ملن كولەمىندە قاراجات بەرىلدى. ونىڭ باسىم بولىگى باعدارلامالىق قامتاماسىز ەتۋدى ازىرلەۋگە، پىسىقتاۋعا، ونىڭ ىشىندە ءوندىرىستى ۇيىمداستىرۋ ءۇشىن جابدىقتار ساتىپ الۋعا جۇمسالدى»، - دەدى IT-شەشىمدەر بويىنشا قازاقستاندىق كومپانيانىڭ باسشىسى ەرجان جانزاكوۆ.
ءوز مۇمكىندىگىن پايدالانۋدى، كەڭەيتۋدى ارماندايتىن باسقا دا ستارتاپ-كومپانيالار ءۇشىن رەسپۋبليكادا يننوۆاسيالىق گرانتتار كونكۋرسى ۇزارتىلدى. وعان قاتىسۋعا ءوتىنىمدى 15 قىركۇيەككە دەيىن بەرۋگە بولادى.