الماتىدا قىزمەتكەرلەرىنىڭ جالاقىسىن كەشىكتىرگەن جۇمىس بەرۋشىلەرگە ايىپپۇل سالىندى

ەڭبەك زاڭناماسى نورمالارىنىڭ 390 رەت بۇزىلعانى انىقتالدى.

جىل باسىنان بەرى الماتى قالالىق ەڭبەك ينسپەكسياسىنىڭ قىزمەتكەرلەرى ازاماتتاردىڭ قۇقىقتارىن قورعاۋعا باعىتتالعان 320 جوسپاردان تىس تەكسەرۋ جۇرگىزدى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«تەكسەرۋ بارىسىندا ەڭبەك زاڭناماسى نورمالارىنىڭ 390 رەت بۇزىلعانى انىقتالدى، زاڭ بۇزۋشىلىقتى جويۋ تۋرالى 220 نۇسقاما بەرىلدى»، - دەدى الماتى قالاسى ەڭبەك ينسپەكسياسى باسقارماسىنىڭ باسشىسى ەركىنبەك امىرعالييەۆ.

سونىمەن قاتار، ول قىزمەتكەرلەرىنە جالاقىنى ۋاقتىلى تولەمەگەن جۇمىس بەرۋشىلەردىڭ اكىمشىلىك جاۋاپقا تارتىلعانىن ايتتى. 

«24،2 ملن تەڭگەگە 179 زاڭدى تۇلعا اكىمشىلىك جاۋاپكەرشىلىككە تارتىلدى (86 زاڭدى تۇلعانىڭ ەڭبەك اقىسىن ۋاقتىلى تولەمەگەنى ءۇشىن 18 ملن تەڭگە تولەندى). جەكە جانە زاڭدى تۇلعالاردىڭ 3 136 ءوتىنىشى قارالدى. جالاقى بويىنشا 212 كاسىپورىندا 300،8 ملن تەڭگەگە بەرەشەك وتەلدى، وسىلايشا 642 قىزمەتكەردىڭ ەڭبەك قۇقىقتارى قورعالدى»، - دەدى ول. 

سپيكەردىڭ سوزىنشە، جىل باسىنان بەرى وندىرىسپەن بايلانىستى 59 جازاتايىم وقيعا تىركەلگەن. 

«زارداپ شەككەندەر سانى – 70، ونىڭ ىشىندە قايتىس بولعانى – 6 ادام، اۋىر دارەجەدەگى جاراقات العاندار – 21 ادام، جەڭىل دارەجەدەگى جاراقات العاندار – 43 ادام. ەڭبەك زاڭناماسىنىڭ نورمالارىن ءتۇسىندىرۋ بويىنشا قالا كاسىپورىندارىندا 2 236 ادامنىڭ قاتىسۋىمەن 87 كەزدەسۋ ءوتتى»، - دەپ ءتۇسىندىردى وڭىرلىك كوممۋنيكاسيالار قىزمەتىندەگى بريفينگىدە الماتى قالاسى ەڭبەك ينسپەكسياسى باسقارماسىنىڭ باسشىسى ەركىنبەك امىرعالييەۆ.