جينالعان استىق جوسپاردىڭ 38%-دان استامىن قۇرايدى.
ەگىن جيناۋ ناۋقانى باستالعاننان بەرى قازاقستاندىق شارۋالار 6،1 ملن گا ءداندى جانە ءداندى-بۇرشاقتى داقىلداردى جيناپ ۇلگەردى، بۇل جوسپاردىڭ 38%-دان استامىن قۇرايدى، دەپ حابارلايدى Almaty-akshamy.kz.
مامانداردىڭ ايتۋىنشا، 12،3 س/گا ورتاشا ونىمدىلىك كەزىندە 7،5 ملن توننا استىق باستىرىلدى، بۇل وتكەن جىلعى كورسەتكىشتەردەن 2،5 ملن تونناعا ارتىق (2021 جىلى وسىنداي كۇنگە 5،1 ملن توننا باستىرىلعان بولاتىن).
«بيىلعى جىلى ونىمدىلىكتىڭ وسۋىنە قولايلى اۋا رايى، سونداي-اق كوكتەمگى دالا جۇمىستارى كەزىندە اگروتەحنيكالىق شارالار كەشەنىن ۋاقتىلى جۇرگىزىلۋى جانە وسىمدىكتەردىڭ ءوسىپ-ونۋ كەزەڭىندە قولايلى فيتوسانيتاريالىق جاعدايدى قامتاماسىز ەتۋ ىقپال ەتتى»، - دەلىنگەن اشم باسپا ءسوز قىزمەتىنىڭ حابارلاماسىندا.
ىشكى تۇتىنۋ مەن قازاقستاندىق نارىقتى قامتاماسىز ەتۋگە جانە بيدايدىڭ ءبىر بولىگىن ەكسپورتقا جونەلتۋ ءۇشىن استىقتىڭ جەتكىلىكتى كولەمى الىنادى دەپ بولجانىپ وتىر.
قارجىلاندىرۋعا كەلەتىن بولساق، 2022 جىلى بيۋدجەتتىك كرەديت 140 ملرد تەڭگەنى قۇرادى، بۇل 2021 جىلعى دەڭگەيدەن 2 ەسە جوعارى. استىقتى فورۆاردتىق ساتىپ الۋ شەڭبەرىندە قارجىلاندىرۋ 100 ملرد تەڭگەگە دەيىن كوبەيتىلدى نەمەسە ءبىر جىل بۇرىنعىعا قاراعاندا 2،5 ەسە ارتتى.
مەملەكەت باسشىسىنىڭ تاپسىرماسىن ىسكە اسىرۋ اياسىندا «جاسىل دامۋ» اق قاراجاتى ەسەبىنەن اۋىل شارۋاشىلىعى تەحنيكاسىن جەڭىلدىكپەن نەسيەلەۋ تەتىگى پىسىقتالعانىن اتاپ ءوتۋ قاجەت. جەڭىلدىكتى ليزينگكە شامامەن 40 ملرد تەڭگە ءبولىندى.
بۇعان قوسا، ەگىن جيناۋ جۇمىستارىن ۋاقىتىلى جۇرگىزۋ ءۇشىن اشتو-گە 423،5 مىڭ توننا جەڭىلدەتىلگەن ديزەل وتىنى ءبولىندى.
اۋىل شارۋاشىلىعى مينيسترلىگى ەگىن جيناۋ جۇمىستارىن تابىستى جۇرگىزۋ ماسەلەسىن تۇراقتى باقىلاۋدا ۇستاپ وتىر. ول ءۇشىن ۆەدومستۆودا بارلىق تۋىنداعان پروبلەمالىق ماسەلەلەردى ۋاقتىلى شەشۋگە ارنالعان جەدەل شتاب جۇمىس ىستەپ جاتىر.