قازاقستاندىق رەجيسسەر سامعار راقىمنىڭ «كوشە اقىنى» ءفيلمى وڭتۇستىك كورەياداعى حالىقارالىق كينوفەستيۆالدە كورسەتىلەدى.
«كوشە اقىنى» قىسقا مەتراجدى ءفيلمى Music film's Landscape سەكسياسىندا كورسەتىلمەك. بۇل ءبولىم زاماناۋي مۋزىكالىق فيلمدەردەن باستاپ، ءارتۇرلى مۋزىكالىق جانرلار مەن مۋزىكانتتارعا ارنالعان فيلمدەردى، سونىمەن قاتار مۋزىكا ارقىلى امبەباپ ءومىر مەن ءتۇرلى مادەنيەتتەردى كورسەتەتىن بارلىق كارتينالارمەن تانىستىرادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كوشە اقىنى» ءفيلمىنىڭ جەلىسى ۇرپاقتار اراسىنداعى قاقتىعىس ماسەلەسىن قوزعايدى. وقيعا ايتىستا نان تاۋىپ جۇرگەن اكەسى تاڭجارىق پەن ونىڭ ۇلى تۇراننىڭ اراسىندا ءوربيدى. ماسەلەن، رەپكە قىزىعىپ، ءتۇرلى ريفمالار مەن رەچيتاتيۆتەردى قۇراستىراتىن ۇلىنىڭ ونەرىن اكەسى قابىلدامايدى. ءفيلمنىڭ اۆتورلارى كورەرمەنگە كەز كەلگەن تۇسىنىسپەۋشىلىكتى شەشىپ، ۋاقىتتىڭ جاڭا تەندەنسيالارىنا بەيىمدەلۋگە بولاتىندىعىن، سونىمەن قاتار اتا-بابالار مۇرا ەتكەن قۇندىلىقتاردى ساقتاۋ كەرەكتىگىن كورسەتۋگە تىرىسقان.
وتكەن جىلى «كوشە اقىنى» اقش-تا وتكەن Meihodo International Youth visual Media Festival 4ء-شى حالىقارالىق كينوفەستيۆالىندە «مۋزىكالىق بەينە» ساناتىندا ماراپاتقا يە بولدى جانە Annapolis Film Festival كورەرمەندەر كوزايىمى جۇلدەسىن جەڭىپ الدى. سونداي-اق، جىل سايىنعى 6-شى حالىقارالىق Baiqonyr International Short Film Festival قىسقامەتراجدى كينو فەستيۆالىندە كارتينا «ۇزدىك مونتاج» نوميناسياسى بويىنشا ۇزدىك تانىلدى.
ايتا كەتەيىك، 18ء-شى حالىقارالىق مۋزىكا جانە كينو فەستيۆالى چەحچون قالاسىندا (وڭتۇستىك كورەيا) ءوتىپ جاتىر.