ىزدەۋ-قۇتقارۋ جۇمىستارى جۇرگىزىلە باستاعان كۇننەن باستاپ قازاقستان تجم قۇتقارۋشىلارى 7 ادامدى قۇتقارىپ، مەديسينا قىزمەتكەرلەرىنە تاپسىردى.
قايتىس بولعان 88 ادامنىڭ، ونىڭ ىشىندە 10 بالانىڭ دەنەسى ءۇيىندى استىنان شىعارىلدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
قازاقستان تجم اپاتتار مەديسيناسى ورتالىعىنىڭ دارىگەرلەرى زارداپ شەككەن ادامدارعا تاۋلىك بويى العاشقى مەديسينالىق كومەك كورسەتۋدە. وتكەن كەزەڭدە 140-تان استام جەرگىلىكتى تۇرعىنعا، سونىڭ ىشىندە 17 بالاعا مەديسينالىق كومەك كورسەتىلدى. ولاردىڭ ىشىندە سترەسستىڭ جەدەل رەاكسياسىمەن، سالقىن تيۋ، تىنىس الۋ جولدارىنىڭ اۋرۋلارىمەن، سونداي-اق ءارتۇرلى جاراقاتتارمەن بايلانىستى اۋرۋلار باسىم.
ءبىرىنشى كۇننەن باستاپ جەدەل شتاب جۇمىسىن جالعاستىرىپ جاتىر. قازىرگى ۋاقىتتا قازاقستان تجم قۇتقارۋشىلارى ەكى ەلدى مەكەندە ىزدەۋ-قۇتقارۋ جۇمىستارىن جالعاستىرۋدا. قيراعان ۇيلەردىڭ ورنىنداعى ۇيىندىلەردىڭ اراسىن اشۋ جۇمىستارى جۇرگىزىلىپ جاتىر. قۇتقارۋشىلار تۇراقسىز قۇرىلىمداردى بولشەكتەۋ جانە ارنايى كەسكىشتىڭ كومەگىمەن جول تازارتۋ جانە قيراندىلاردىڭ استىنان زارداپ شەككەندەردى ىزدەۋدى جەڭىلدەتۋ ءۇشىن ۇيىندىلەردىڭ استىنداعى ارماتۋرانى كەسۋ جۇمىستارىن جۇرگىزۋدە. بۇل بەتون، ارقالىقتار جانە باسقا دا قۇرىلىس قالدىقتارىن بولشەكتەپ، ارنايى تەحنيكاعا جۇكتەۋدى جەڭىلدەتۋ ءۇشىن جاسالادى.
قۇتقارۋشىلاردىڭ ءبىر توبى توعىز قاباتتى عيماراتتا جۇمىس جۇرگىزىپ جاتىر. عيمارات تولىعىمەن قيراعان. ۇيىندىلەردىڭ اراسىنان ادامداردى ىزدەۋ جۇمىستارى جالعاسىپ جاتىر. بۇل جەردە ۇيىندىلەردىڭ استىنان 4 ادام قۇتقارىلدى، 30 قازا تاپقان ادامنىڭ ءمايىتى شىعارىلدى.
قۇتقارۋشىلاردىڭ باسقا توبى التى قاباتتى عيماراتتا جۇمىس جۇرگىزدى. عيمارات تولىعىمەن قيراعان. ۇيىندىلەردىڭ اراسىنان قايتىس بولعان 24 ادامنىڭ ءمايىتى شىعارىلدى.
قازاقستان تجم ەكىنشى ەشەلونمەن بارعان قۇتقارۋشىلار تۇركياعا كەلگەن ساتتەن باستاپ نۋرداگى قالاسىندا ىزدەۋ-قۇتقارۋ جۇمىستارىن تاۋلىك بويى جۇرگىزدى. تولىعىمەن قيراعان عيماراتتا قازاقستاندىق قۇتقارۋشىلار ادامداردىڭ ورنالاسقان جەرى مەن جاي-كۇيىن انىقتاۋ، ۇيىندىلەر استىندا زارداپ شەككەندەرمەن اۋديو بايلانىس ورناتۋ، قاجەتتى كومەكتىڭ كولەمى مەن سيپاتىن انىقتاۋ بويىنشا جۇمىستارىن جۇرگىزدى. قازاقستاندىق قۇتقارۋشىلاردىڭ ۇلكەن تەرەڭدىكتەگى ۇيىندىلەردىڭ استىنان زارداپ شەككەندەردى ەۆاكۋاسيالاۋ ءۇشىن جول اشۋ جۇمىستارىن ورىنداپ، جەدەل جانە ساۋاتتى ءىس - قيمىلدىڭ، سونداي-اق زارداپ شەككەندەردى بلوكتان شىعارۋ بويىنشا ۋاقىتىلى قابىلدانعان شارالاردىڭ ناتيجەسىندە كولەمى 18 مىڭ تەكشە مەتردەن استام ءۇيىندىنىڭ استىنان ءۇش ءتىرى ادامدى - ەر ادام مەن ەكى ايەلدى شىعارۋعا مۇمكىندىك تۋدى. ادامدار دەرەۋ مەديسينالىق قىزمەتتەرىنە جەتكىزىلدى. قايتىس بولعان 11 ادامنىڭ ءمايىتى شىعارىلدى. زارداپ شەككەن ادامداردى ىزدەۋگە تەحنيكالىق قۇرالدار، ۇيىندىلەردى بولشەكتەۋگە ينجەنەرلىك تەحنيكا پايدالاندى. ۇيىندىلەردىڭ اراسىنان ادامداردى ىزدەۋ جۇمىستارى جالعاسىپ جاتىر.