ەجەلگى ساقتار داۋىرىنە قاتىستى تاريحي دەرەكتەر شەتەلدىك ۋنيۆەرسيتەت قابىرعاسىندا قالىڭ كوپشىلىككە ايتىلدى
ارحەولوگ، پروفەسسورلار زەينوللا ساماشيەۆ پەن ابدەش تولەۋبايەۆتىڭ لەكسياسىن تىڭداۋعا وسى وقۋ ورنىنىڭ وقىتۋشىلارى، ستۋدەنتتەرى جانە باسقا دا بريتانيالىق وزىق وقۋ ورىندارىنان كەلگەن عالىمدار جينالدى. پروفەسسورلار ءبىزدىڭ داۋىرىمىزگە دەيىنگى I مىڭجىلدىقتا قازىرگى قازاقستان اۋماعىن مەكەندەگەن ەجەلگى ساقتاردىڭ تاريحى مەن مادەنيەتى جانە قورعاندارىنان تابىلعان التىن ارتەفاكتىلەرى تۋرالى باياندادى، دەپ حابارلايدى Almaty-akshamy.kz
«ولار ءبىزدىڭ تاريحىمىزدى، جاڭا جادىگەرلەردى بىلمەيدى. تەك كەڭەس وداعى كەزىندەگى ەسكەرتكىشتەر، جادىگەرلەر، دەرەكتەردەن عانا حاباردار. ال ءبىزدىڭ اكەلىپ كورسەتكەن دۇنيەلەرىمىز، ايتىپ جاتقان ويلارىمىزدىڭ بارلىعى كەيىنگى 5-10 جىلدىڭ ىشىندە اشىلىپ جاتقان جاڭالىقتارعا نەگىزدەلگەن. سوندىقتان ولار ءۇشىن بۇل وتە قىزىق»،- دەيدى تاريح عىلىمدارىنىڭ دوكتورى، پروفەسسور زەينوللا ساماشيەۆ.
«جالپى، ساقتاردىڭ ءتىلى، ولاردىڭ مادەنيەتىنىڭ سيپاتى جونىندەگى اڭگىمەلەر بولدى. ءبىز وسى بۇگىنگە دەيىن ساقتاردى «يندويران»، «ينداريي» دەپ كەلسەك، بۇلاردىڭ كونە تۇركىلەر ەكەندىگىن، پروتوتۇركىلەر ەكەندىگىن دالەلدەپ ءسوز قوزعادىق»، - دەيدى ءال-فارابي اتىنداعى قازاق ۇلتتىق ۋنيۆەرسيتەتى، ارحەولوگيا كافەدراسىنىڭ پروفەسسورى ابدەش تولەۋبايەۆ.
«گيبريدتى» فورماتتا، ياعني وفلاين ءارى ونلاين وتكەن دارىسكە كەمبريدج ستۋدەنتتەرىمەن قاتار الەمنىڭ تۇكپىر-تۇكپىرىنەن 200-دەن استام ادام قاتىستى. ارحەولوگيا سالاسى بويىنشا وقىپ ءارى وقىتىپ جۇرگەن جاس عالىمدار سۇراقتار قويىپ، تىڭ اقپاراتتارمەن سۋسىندادى.
«مەن UCL ۋنيۆەرسيتەتى جانىنداعى ارحەولوگيالىق ماتەريالدار ينستيتۋتىنىڭ لەكتورىمىن. لوندوننان كەمبريدجگە ارنايى كەلىپ، پروفەسسورلاردىڭ عاجاپ لەكسياسىن تىڭدادىم. سول كەزدەگى باي-شونجارلار قايتىس بولعاندا، ايەلدەرىمەن بىرگە ەمەس، انالارىمەن، جيەندەرىمەن بىرگە جەرلەنگەنى تۋرالى ءبىلدىم. ول ءداۋىر تۋرالى ءالى دە كوپ نارسەدەن بەيحابار ەكەندىگىمە كوزىم جەتتى»، - دەدى UCL ۋنيۆەرسيتەتىنىڭ وقىتۋشىسى ميلەنا راديۆوۆيچ.
قازاقستاندىق عالىمدار دارىستەن بولەك كەمبريدج ۋنيۆەرسيتەتىنىڭ لابوراتوريالارىن دا ارالادى. ارىپتەستەرىنىڭ عىلىمي تالداۋ ادىس-تاسىلدەرىن كورىپ، تاجىريبە الماسۋعا شاقىردى. سونداي-اق ۋنيۆەرسيتەتتىڭ وقۋ جوسپارىمەن تانىسىپ، ستۋدەنت جانە ۇستاز الماسۋعا ۋاعدالاستى. كەمبريدج ۋنيۆەرسيتەتىنىڭ عالىمدارىن قازاقستانعا شاقىرىپ، عىلىمي ەكسپەديسياعا بىرگە قاتىسۋ جوسپارى جاسالدى.