يرلانديانىڭ دۋبلين قالاسىندا گەوگرافيادان IGeO-2024 حالىقارالىق وليمپياداسى باستالدى.
بۇل جارىسقا 50 ەل قاتىسىپ جاتىر. ەلىمىزدىڭ قۇراما كومانداسىندا ءتورت وقۋشى بار، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
كوماندا قۇرامىندا:
اقجول بولات — فمب نزم، 11-سىنىپ وقۋشىسى، تالدىكورعان قالاسى؛
ارسەن سىدىقوۆ —حبب نزم، 11-سىنىپ وقۋشىسى، شىمكەنت قالاسى؛
قانات سەرىكباي — حبب نزم، 11-سىنىپ وقۋشىسى، شىمكەنت قالاسى؛
جومارت سابىر — دارىندى بالالارعا ارنالعان مامانداندىرىلعان «دارىن» ليسەي-ينتەرناتىنىڭ 11-سىنىپ وقۋشىسى، جامبىل وبلىسى.
كوماندا جەتەكشىلەرى: نۇرلان جۇماگەلدى - «دارىن» رعپو ديرەكتوردىڭ ورىنباسارى، ماقسات اۋباكيروۆ - «دارىن» رعپو ءبولىم باسشىسى.
انىقتاما ءۇشىن: IGeO 1996 جىلدان بەرى IGU حالىقارالىق گەوگرافيالىق وداعىنىڭ قولداۋىمەن وتكىزىلىپ كەلەدى. جارىسقا 16-19 جاس ارالىعىنداعى ۇلتتىق وليمپيادالاردىڭ جەڭىمپازدارى قاتىسادى. نەگىزگى ماقساتى — وقۋشىلاردىڭ گەوگرافيا مەن قورشاعان ورتا تۋرالى باسقا دا عىلىمدارعا قىزىعۋشىلىعىن ارتتىرۋ جانە حالىقارالىق بايلانىستاردى دامىتۋ. بۇل حالىقارالىق ءبىلىم دوداسىندا قازاقستان قۇراماسى 2023 جىلى 1 التىن جانە 1 قولا مەدال جەڭىپ الدى.