US Open FIRST LEGO League حالىقارالىق چەمپيوناتىندا قاراعاندى وبلىسىنىڭ «مۇراگەر» مامانداندىرىلعان مەكتەپ-ينتەرناتى جانە شىمكەنت قالاسىنداعى نزم وقۋشىلارى قولا مەدال جەڭىپ الدى.چەمپيوناتقا الەمنىڭ 20 ەلىنەن 700 - دەن استام وقۋشى قاتىستى، دەپ حابارلايدى almaty-akshamy.kz قازاقستان رەسپۋبليكاسىنىڭ وقۋ-اعارتۋ مينيسترلىگىنە سىلتەمە جاساپ.
شىمكەنتتىك «Clutch» توبى Innovation Project Award نوميناسياسىندا ۇزدىك ۇشتىككە ەنىپ، قولا جۇلدەگە يە بولدى. ولار جەل گەنەراتورى مەن كۇن پانەلدەرىنەن الىناتىن ەلەكتر ەنەرگيانى ساقتاۋعا مۇمكىندىك بەرەتىن يننوۆاسيالىق جوبا ۇسىنعان بولاتىن. جەل ەلەكتر ستانسياسىن دايىنداعان قاراعاندىلىق «JelToqSun» كومانداسى ەل تاريحىندا العاش رەت جارىستىڭ Champions Award باستى جۇلدەسىنىڭ 3-ورنىنا قول جەتكىزدى.
«ءبىز چەمپيوناتقا جارتى جىلدان استام ۋاقىت دايىندالدىق. ءۇش كۇندىك جارىس ءبىز ءۇشىن وتە قىزىقتى بولدى، ويتكەنى مىقتى قارسىلاستار كەلدى. العاشىندا قوبالجىعانمەن ىشكى قورقىنىشتى جەڭىپ، ءوز قابىلەتىمىزدى كورسەتە الدىق. ءبىز روبوتتار ويىنىندا كوشباسشىلار قاتارىندا بولدىق. يننوۆاسيالىق جوبانى تانىستىرىپ، ءوزىمىزدىڭ ۇيىمشىلدىعىمىزدى كورسەتە بىلدىك»، – دەيدى قاتىسۋشىلاردىڭ ءبىرى اكبار ەرمەكوۆ.
جارىس اراسىندا قازاقستاندىق وقۋشىلار MIT، Boston University جانە Harvard سەكىلدى بەدەلدى وقۋ ورىندارىنىڭ ينجەنەرلىك فاكۋلتەتتەرىنە بارىپ، پروفەسسورلارمەن جەكە تانىستى. ولاردىڭ پىكىرىن تىڭداپ، ءوز تاجىريبەلەرىنە قاجەت كەڭەس الدى.
ەستەرىڭىزگە سالا كەتەيىك، ەكى كوماندا دا وقۋ-اعارتۋ مينيسترلىگىنىڭ قولداۋىمەن جىل باسىندا USTEM Robotics قوعامدىق قورى ۇيىمداستىرعان FIRST Central Asia ورتالىق ازيا ويىندارىندا حالىقارالىق چەمپيوناتقا جولداما العان بولاتىن.