110 ەلدەن 50 مىڭنان استام وقۋشى قاتىسقان حيۋستونداعى FIRST Championship 2025 حالىقارالىق ينجەنەرلىك تۋرنيرىندە قازاقستان قۇراماسى ءۇش جاس ساناتى بويىنشا رەكوردتىق ناتيجە كورسەتتى، دەپ حابارلايدى aqshamnews.kz.
وقۋ-اعارتۋ مينيسترلىگىنىڭ مالىمەتىنشە، قازاقستان نامىسىن جەتى كوماندا قورعادى. جوعارى ساناتتا (12–18 جاس) الماتى قالاسىنداعى نازاربايەۆ زياتكەرلىك مەكتەبىنىڭ PID كومانداسى ەلىمىز تاريحىندا تۇڭعىش رەت جارىستىڭ فينالىنا ءوتىپ، ەكى ماراپات يەلەندى — Motivate Award Winner جانە Division Finalist Award.
الماتىداعى نازاربايەۆ زياتكەرلىك مەكتەبىنىڭ CRISTABOL كومانداسى تەحنيكالىق جانە تەحنيكالىق ەمەس داعدىلاردىڭ ۇزدىك ۇيلەسىمى ءۇشىن بەرىلەتىن ەڭ بەدەلدى ماراپات — INSPIRE Award-تى جەڭىپ الدى.
Sana Team (الماتىداعى ءبىلىم-يننوۆاسيا ليسەيى) جانە Jeltoqsun (قاراعاندى قالاسىنداعى «مۇراگەر» مەكتەبى) كوماندالارى روبوتتار ويىنى بويىنشا 258 كوماندانىڭ ىشىنەن توپ-20 قاتارىنا ەندى.
وقۋ-اعارۋ مينيسترلىگىنىڭ مالىمەتىنشە، ورتا ساناتتا (10–16 جاس) — FIRST LEGO League Challenge تۋرنيرىندە استانا قالاسىنداعى «Skillset» مەكتەبىنىڭ SKILLSET كومانداسى Champions Award نوميناسياسى بويىنشا فيناليست اتاندى. قاراعاندىداعى «مۇراگەر» مەكتەبىنىڭ RASSLEXX كومانداسى Coopertition Award Winner ماراپاتىن جەڭىپ الدى.
كىشى ساناتتا (6–10 جاس) — FIRST LEGO League Explore بويىنشا پاۆلودار قالاسىنداعى «ساتۋرن» مەكتەبىنىڭ ATLANTIS كومانداسى Team Model Award ماراپاتىنا يە بولدى.
FIRST Global Challenge چەمپيوناتىنىڭ ەرەكشەلىگى — بۇل جارىسقا ءارتۇرلى جاس دەڭگەيىندەگى بىرنەشە كوماندا قاتىسادى. قازاقستان بۇل چەمپيوناتقا نەبارى بەس جىلدان بەرى قاتىسىپ كەلەدى. سوعان قاراماستان، ونداعان جىلدىق تاجىريبەسى بار مەملەكەتتەرمەن تەڭ دارەجەدە باسەكەگە تۇسۋدەمىز، — دەدى USTEM Foundation قورىنىڭ جەتەكشىسى اسىلبەك مۇرزاحمەتوۆ.