قازاقستاندىق Naruvax-C19 ۆاكسيناسىن ادامدارعا تەستىلەۋگە دايىن
حالىقارالىق ۆاكسيناسيا ورتالىعىنىڭ ديرەكتورى قايسار تابىنوۆ «قازپراۆدا» باسىلىمىنا بەرگەن سۇحباتىندا وتاندىق Naruvax-C19 ۆاكسيناسى سوڭعى كەزەڭگە جەتكەنىن جانە ادام اعزاسىنداعى كلينيكالىق زەرتتەۋلەرگە دايىن ەكەنىن ايتتى، دەپ حابارلايدى Almaty-akshamy.kz.
زەرتتەۋشىلەر ماكاكالارعا تاجىريبە جاساۋدى اياقتادى، وعان دەيىن تىشقاندار مەن حومياكتارعا زەرتتەۋ جۇرگىزگەن. ناتيجەسىندە ۆاكسينا جانۋارلاردى ينفەكسيادان قورعاپ قانا قويماي، ۆيرۋستى 100% بەيتاراپتاندىرعان.
تابىنوۆتىڭ ايتۋىنشا، مايمىلدارعا جاسالعان جۇمىستار تۋرالى سوڭعى يممۋنوگەندىلىك دەرەكتەردى العاننان كەيىن، ادامداردا تەستىلەۋ جۇمىسىن باستاۋعا بولادى.
ادام اعزاسىنداعى Naruvax-C19 كلينيكالىق سىناقتارى مۇقيات دايىندىقتى قاجەت ەتەدى.
ءبىرىنشى سىناق ۆاكسينانى ازىرلەۋشى توپقا جاسالادى.
«بۇگىندە كوروناۆيرۋسقا قارسى ۆاكسينالاردىڭ ەشبىرى ينفەكسيادان تولىقتاي قورعاي الماسا دا، اۋرۋدىڭ اۋىر ءوتۋىنىڭ جانە اۋرۋحاناعا ءتۇسۋدىڭ الدىن الادى. Naruvax-C19 تۋرالى ايتاتىن بولساق، بۇل پرەپارات ءالى كلينيكالىق سىناقتاردان وتپەگەن، سوندىقتان قورىتىندى جاساۋعا ەرتەرەك»، - دەدى ول.
قازىرگى ۋاقىتتا ۆاكسينا تۋرالى عىلىمي ماقالا پرەپينتى Researsh Square حالىقارالىق پلاتفورماسىندا ورنالاسقان. سونىمەن بىرگە Nature جۋرنالىنا ۇسىنىلعان.
«ءبىز ماقالا وڭ باعاسىن الىپ، جاقىن ارادا جاريالانادى دەپ ۇمىتتەنەمىز»، - دەدى رەسپوندەنت.