سوڭعى ءۇش جىلدا ەلىمىزدە موبيلوگرافيا سالاسى قارقىن الىپ كەلەدى
شىمكەنت قالاسىندا العاش رەت تۋريزم جانە سىرتقى بايلانىستار باسقارماسىنىڭ ۇيىمداستىرۋىمەن «كرەاتيۆتى يندۋستريا» باعىتى اياسىندا موبيلوگرافتاردىڭ «Shymkent Mobilography Fest» رەسپۋبليكالىق فەستيۆالى ءوتتى، دەپ حابارلايدى Almaty-akshamy.kz
شاراعا قاتىسۋعا 900-گە جۋىق ادام ءوتىنىم بىلدىرگەن. قاتىسۋشىلاردىڭ باسىم بولىگى شىمكەنت جانە نۇر-سۇلتان، الماتى، تۇركىستان قالالارىنان بولدى. ولار سايىستىڭ العاشقى كۇنىندە الدىن الا بەرىلگەن «Welcome to Shymkent» تاقىرىبىندا قالا تۋرالى يميدجدىك جانە كرەاتيۆتى جارنامالىق بەينەروليكتەر ءتۇسىردى. دايىن بەينەروليكتەردى ەلىمىزدە موبيلوگرافيا سالاسىن دامىتقان قىران تالاپبەك باستاعان كوميسسيا مۇشەلەرى باعالاپ، جەڭىمپازدار ءتىزىمىن جاريالادى. جەڭىمپازدارعا باعالى سىيلىقتار تابىستالدى.
شارا اياسىندا وتكەن پلەنارلىق كەزدەسۋگە قالا اكىمىنىڭ ورىنباسارى ماقسۇت يساحوۆ، وركەن كەنجەبەك، سىرىمبەك تاۋ، اقبوتا انۋاربەك جانە ادىلەت راحمەتوللا سىندى بىرنەشە ماديا سالاسى مەن ءتۇرلى باعىتتا ءوز باستامالارىن دامىتىپ جۇرگەن الەۋمەتتىك جەلى بەلسەندىلەرى قاتىسىپ، كرەاتيۆتى يندۋستريا مەن موبيلوگرافيانىڭ تۋريزم سالاسىنداعى رولىنە توقتالدى.
ەكى كۇنگە سوزىلعان ءىس-شارادا ەلىمىزدىڭ ءۇشىنشى مەگاپوليسى تۋرالى ساپالى بەينەروليكتەر ازىرلەندى. روليكتەر الداعى ۋاقىتتا جارنامانى جانداندىرىپ، تۋريستەردى تارتۋ ماقساتىندا جاريالانىپ وتىرماق. جالپى ەلىمىزدە سوڭعى 3 جىلدا موبيلوگرافيا سالاسى دامىپ كەلەدى. وعان قىزىعۋشى ءارى كاسىپ ەتكەندەر سانى ەلۋ مىڭعا جۋىقتاعان.