«نوۆايا ۆولنا-2021» فەستيۆالىنىڭ ەكىنشى بايقاۋ كۇنى نەسىمەن ەستە قالدى؟
قازاقستاندىق «Mezzo» توبى «نوۆايا ۆولنا» بايقاۋىنىڭ ەكى كۇندىك بايقاۋ ناتيجەسى بويىنشا ءۇشىنشى ورىندا، دەپ حابارلايدى Almaty-akshamy.kz.
بايقاۋ باعدارلاماسى باستالماس بۇرىن ءادىل قازىلار مۇشەلەرىنىڭ قاتىسۋمەن كونسەرت ءوتتى. بەلگىلى ارتىستەردىڭ ساحنادا ونەر كورسەتۋى بايقاۋعا قاتىسۋشىلار ءۇشىن ءوز الدىنا شەبەرلىك ساعاتى ىسپەتتى بولدى. كوبىنىڭ ءتۇرلى حالىقارالىق بايقاۋلارعا قاتىسۋ تاجىريبەسى بار، سوندىقتان دا ءاربىر قاتىسۋشى ءۇشىن وزدەرىنىڭ شىعارماشىلىق ءومىر جولدارىندا «نوۆايا ۆولنا» سىندى اۋقىمدى شارالارعا قاتىسۋدىڭ ماڭىزى زور.
جەرلەسىمىز ديماش قۇدايبەرگەن يگور كرۋتويدىڭ «يا سكۋچايۋ پو تەبە» كومپوزيسياسىن اۆتوردىڭ سۇيەمەلدەۋىمەن ورىندادى. انسۇيەر قاۋىم ءارتىستىڭ ورىنداۋىن جىلى قابىلدادى، زالدا رەسەي مەن وزگە دە ەلدەردىڭ ديماشتىڭ ونەرىنە تابىنۋشىلاردىڭ - Dears قاتارى قالىڭ بولدى.
بايقاۋ بارىسىندا جۇرگەن رەپورتەرلەر قازاقستاندىق ورىنداۋشىنىڭ شىعارماشىلىعىنا قىزىعۋشىلىق ءبىلدىرۋشى كورەرمەندەر كوپ ەكەنىن ايتۋدا. ديماش ءوزىنىڭ بارشا تىڭدارماندارىنا العىس ايتىپ، رەسەيلىك ارىپتەستەرىنىڭ ونەرلەرىنە ءتانتى ەكەنىن ءبىلدىردى.
كونسەرت سوڭىندا ءادىل قازىلار مۇشەلەرىنىڭ ءبارى «نوۆايا ۆولنا» بايقاۋىنىڭ نەگىزىن قالاۋشىلاردىڭ ءبىرى، كسرو حالىق ءارتىسى رايموند پاۋلستى 85 جىلدىق مەرەيتويىمەن قۇتتىقتادى.
كەش بايقاۋدىڭ ەكىنشى كۇنىمەن جالعاستى. ءاربىر قاتىسۋشىنىڭ الدىندا ءوز ەلىنىڭ تانىمال اۋەنىن تىڭدارمان جۇرەگىنە جەتكىزۋ مىندەتى تۇردى. ءان دوداسىنا قازاقستان اتىنان قاتىسۋشى «Mezzo» كۆارتەتى ەريك چانتۋريانىڭ سوزىنە جازىلعان كومپوزيتور پاۆەل ەسەنيننىڭ «دوجد» ءانىن ورىندادى. بۇل ءان بەلگىلى قازاقستاندىق ءارتىس باتىرحان شۇكەنوۆتىڭ ورىنداۋىندا پوستكەڭەستىك كەڭىستىكتە جاقسى تانىمال.
بايقاۋدىڭ ەكىنشى كۇنىنىڭ قورىتىندىسى بويىنشا، قازىلار القاسى ءتورت قاتىسۋشىنىڭ ونەرىن جوعارى باعالاپ وتىر. ولار: يسپانيالىق حورسە گونسالەس (169 ۇپاي)، قازاقستان نامىسىن قورعاۋشى «Mezzo» توبى (170) ۇپاي، بولگاريالىق ورىنداۋشى دەنيسا كاراسلاۆوۆا (173 ۇپاي) جانە ارمەنيالىق ءانشى Saro ەڭ جوعارى كورسەتكىش – 179 ۇپايدى يەلەندى.