مەملەكەتتەر باسشىلارى اۋعانستانداعى جاعداي جانە ونىڭ ۇيىمعا مۇشە مەملەكەتتەردىڭ قاۋىپسىزدىگىنە تيگىزەر اسەرى تۋرالى پىكىر الماستى. سونداي-اق ورتالىق ازيا ايماعىنداعى سىن-قاتەرلەردىڭ الدىن الۋعا باعىتتالعان ءىس-قيمىلداردى تالقىلادى.
قاسىم-جومارت توقايەۆ بەينەبايلانىس ارقىلى وتكەن ۇجىمدىق قاۋىپسىزدىك تۋرالى شارت ۇيىمى ۇجىمدىق قاۋىپسىزدىك كەڭەسىنىڭ كەزەكتەن تىس سەسسياسىنا قاتىستى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قازاقستان پرەزيدەنتى ءوز سوزىندە بارلىق سىن-قاتەرلەردى، سونىڭ ىشىندە تەرروريزم مەن ەكسترەميزمنىڭ تارالۋى، قارۋ-جاراق پەن ەسىرتكىنىڭ زاڭسىز ساۋداسىنىڭ ارتۋى، زاڭسىز كوشى-قون، بوسقىنداردىڭ جاپپاي قوزعالىسى، ايماققا دەسترۋكتيۆتى ەلەمەنتتەردىڭ ەنۋى سەكىلدى ماسەلەلەردى كەشەندى تۇردە قاراستىرۋ كەرەك ەكەنىنە نازار اۋداردى.
وسىعان بايلانىستى قاسىم-جومارت توقايەۆ ۇجىمدىق قاۋىپسىزدىك جۇيەسىن نىعايتۋعا جانە ۇيىمنىڭ شۇعىل ارەكەت ەتۋىنە باعىتتالعان ءبىرقاتار ۇسىنىس ايتتى.
مەملەكەت باسشىسى اۋعانستانداعى گۋمانيتارلىق جانە ازىق-تۇلىك داعدارىسىنىڭ الدىن الۋ اسا ماڭىزدى ەكەنىن دە اتاپ ءوتتى.
ۇقشۇ ۇجىمدىق قاۋىپسىزدىك كەڭەسىنىڭ كەزەكتى سەسسياسى بيىل 16 قىركۇيەكتە دۋشانبە قالاسىندا وتەدى.