قازاقستاندىق ماماندار وتكەن ايداعى ىسكەرلىك بەلسەندىلىك يندەكسى جايىندا ايتتى

ءبىرشاما تومەندەدى.

ق ر ۇب اقشا-كرەديت ساياساتى دەپارتامەنتىنىڭ ديرەكتورى رۇستەم ورازالين مامىر ايىنداعى ىسكەرلىك بەلسەندىلىك يندەكسى تۋرالى مالىمەت بەردى، دەپ حابارلايدى Almaty-akshamy.kz Inbusiness.kz سىلتەمە جاساپ. 

ماماننىڭ سوزىنە سۇيەنسەك، مامىردا ىسكەرلىك بەلسەندىلىك يندەكسى 49،0 (ساۋىردە – 49،5) بولىپ، ءبىرشاما تومەندەگەن. دەگەنمەن كورسەتكىش «گەوساياسي جاعدايدىڭ جانە ونىمەن بايلانىستى سالداردىڭ ىقپالىندا بولعان ناۋرىزداعى دەڭگەيدەن (48،2)» جوعارى.

«ىسكەرلىك بەلسەندىلىكتىڭ ءوسۋى ءوندىرىس سەكتورىندا بايقالدى: يندەكس 50،9-عا دەيىن كوتەرىلدى (ساۋىردە – 50،5). قىزمەت كورسەتۋ سەكتورىندا جانە تاۋ-كەن ءوندىرۋ ونەركاسىبىندە ىسكەرلىك بەلسەندىلىك، تيىسىنشە، 48،8-گە جانە 48،3-كە دەيىن تومەندەدى. قۇرىلىستا يندەكس 44،6-دان 46،2-گە دەيىن كوتەرىلدى»، - دەيدى رۇستەم ورازالين.

ايتا كەتسەك، بارلىق سەكتوردا جەتكىزىلىم مەرزىمدەرى ۇزارعان. قۇرىلىستا جۇمىسپەن قامتۋ جاعدايى ازداپ جاقسارعان، ءبىراق تاپسىرىس كولەمى تومەن دەڭگەيدە قالىپ وتىر.

«2022 جىلعى مامىردا كاسىپورىنداردىڭ اعىمداعى بيزنەس-جاعدايلاردى باعالاۋى وزگەرىسسىز قالدى. تەرىس وزگەرىستەردى اتاپ وتكەن رەسپوندەنتتەر سانى بۇرىنعىسىنشا باسىم. الايدا، كاسىپورىنداردىڭ بولاشاق بيزنەس-جاعدايلارىنا قاتىستى سەنىمى ايتارلىقتاي جاقساردى (كەلەشەك جاعدايلاردى باعالاۋ بيىلعى ساۋىردەگى 7،3-تەن 22،5-كە دەيىن ۇلعايدى). ناتيجەسىندە اعىمداعى جانە بولاشاق بيزنەس-جاعدايلاردى ورتاشا باعالاۋدى بىلدىرەتىن بيزنەس-احۋال يندەكسى بيزنەستى جۇرگىزۋدىڭ بولاشاق جاعدايلارىنا قاتىستى، اسىرەسە، قۇرىلىس سالاسىنداعى كاسىپورىنداردا ءوپتيميزمدى جاقسارتۋ ەسەبىنەن 9،2 (ساۋىردە – 2،2) قۇراپ، ايتارلىقتاي جاقساردى»، - دەدى دەپارتامەنت ديرەكتورى.