ماينداعى فرانكفۋرت قالاسىندا IMEX ىسكەرلىك تۋريزم سالاسىنداعى ءىرى جارمەڭكەلەردىڭ بىرىنە قازاقستان «ەۋرازيا كىندىگىندە كەزدەسىڭىزدەر!» ۇرانىمەن قاتىستى.
بيىل كورمەدە ءىرى تۋريستىك اگەنتتىكتەردىڭ، اۋە كومپانيالارىنىڭ باسشىلارى، جەتەكشى قوناق ءۇي يەلەرى مەن ساراپشىلار باس قوستى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
90-نان استام ەلدەن 3 مىڭداي ادام كەلدى. بيىل ەلىمىزدىڭ اتىنان جارمەڭكەگە وتاندىق تۋروپەراتورلار، مەيمانحانا بيزنەسىنىڭ وكىلدەرى جانە ۇيىمداستىرۋشىلار قاتىستى. ولار جوعارى دەڭگەيدەگى كونگرەسستەردى، كورمەلەر مەن سامميتتەردى وتكىزۋگە دايىن ەكەندەرىن مالىمدەدى.
"مىسالى، 2019 جىلى قازاقستان 12 حالىقارالىق ءىس-شارا ارقىلى 6 ميلليون دوللاردان استام تابىس تاپتى. جاقىن ارادا وسى كورسەتكىشتەرگە تاعى جەتەمىز دەپ ويلايمىن. وعان قوسا ەلىمىزگە كەلۋ وڭاي. ۆيزا بويىنشا عانا ەمەس، ەۋروپا، ازيا ەلدەرى، باسقا ەلدەرمەن دە اۋە قاتىناسى ورناتىلعان. ۇشىنشىدەن، بۇل، ارينە، ينفراقۇرىلىمنىڭ قولجەتىمدىلىگى جانە ونىڭ باعاسى ماسەلەلەرى. ءبىزدىڭ سايتتاردى ەۋروپالىق قالالارمەن سالىستىرعاندا قولجەتىمدى باعامەن برون الۋعا بولادى"، - دەدى «Kazakh Tourism» اق تۋريستىك ونىمدەر دامىتۋ دەپارتامەنتىنىڭ باس مەنەدجەرى عالىمجان سەيىلوۆ.
شەتەل ساراپشىلارىنىڭ ايتۋىنشا، قازاقستان - ىسكەرلىك تۋريزم تۇرعىسىنان قولايلى ەل. بيىلعى جىلى ءبىرقاتار شەتەلدىك كومپانيالار ەلىمىزدە ءوز ءىس-شارالارىن جوسپارلاپ قويعان.
"قازاقستاندا بيزنەس وكىلدەرى ءۇشىن كونفەرەنسيا وتكىزۋ جوسپارىمىزدا بار. ءبىز 40 ەلدەن 200-دەي قوناق كۇتەمىز. بۇل شارانى قازاقستاندا وتكىزۋدى شەشتىك، ويتكەنى ءسىزدىڭ ەلدەرىڭىز ەۋروپا مەن ازيا اراسىندا تاماشا ورنالاسقان. سوندىقتان الەمنىڭ تۇكپىر-تۇكپىرىنەن كومپانيالاردى شاقىرۋ ىڭعايلى. ايتا كەتەيىك، تەك ەۋرووداقتان عانا ەمەس، اقش-تان سەرىكتەستەرىمىز كەلەدى. ىسكەرلىك كەزدەسۋلەردەن بولەك، قازاقستاننىڭ ەڭ ادەمى جەرلەرىن ارالاۋدى كوزدەپ وتىرمىز"، - دەيدى اتقارۋشى ديرەكتور يەسۋس دجەي موران.
فرانكفۋرتتان بولەك قازاقستاننىڭ تۋريستىك الەۋەتى بيىلعى جىلى الەمنىڭ وزگە الاڭدارى – توكيو، ۆارشاۆا مەن لوندوندا تانىستىرىلادى.