كۋپيۋرانى تەكسەرۋگە بىرنەشە مينۋت ۋاقىت كەتەدى.
ۇستىمىزدەگى جىلدىڭ التى ايىندا قازاقستاندىق ماماندار 408 150 تەڭگەنىڭ قولدان جاسالعانىن انىقتاعان.بۇل وتكەن جىلعى كورسەتكىشتەرمەن سالىسىتىرعاندا 41%-عا از، دەپ حابارلايدى Almaty-akshamy.kz.
«2022 جىلدىڭ ءى جارتىجىلدىعىندا قازاقستان ۇلتتىق بانكى مەن ەكىنشى دەڭگەيلى بانكتەر 408 150 تەڭگەنىڭ قولدان جاسالعان 139 اقشا بەلگىسىن (136 بانكنوت پەن 3 مونەتا) انىقتادى»،- دەلىنگەن ۇلتتىق بانكتىڭ باسپا ءسوز قىزمەتىنىڭ حابارلاماسىندا.
قۇب بانكنوتتار مەن مونەتالاردى ساراپتاۋ باسقارماسىنىڭ باستىعى اسقات مۇقامادييەۆتىڭ ايتۋىنشا، كوپ جاعدايدا نومينالى 2 000 تەڭگەلىك بانكنوتتار (97 دانا) قولدان جاسالعان. ولار جالپى كولەمنىڭ 70%-ىن قۇرايدى. نومينالى 5 000 تەڭگەلىكتەن – 15 دانا (11%)، 10 000 تەڭگەلىكتەن – 10 دانا (7%) اقشا قولدان جاسالعان. قالعان 9%-ى وزگە نومينالداعى بانكنوتتارعا تيەسىلى.
جالعان بانكنوتتاردىڭ كوپ بولىگى الماتىدا – 68 دانا (جالپى كولەمنىڭ
51%-ى)، نۇر-سۇلتان قالاسىندا – 16 دانا جانە شىعىس قازاقستان وبلىسىندا – 29 دانا انىقتالدى.
قازاقستان ۇلتتىق بانكى ءتۇپنۇسقا بانكنوتتاردى قولدان جاسالعان اقشادان اجىراتۋعا كومەكتەسەتىن قاراپايىم قاعيدالاردىڭ بار ەكەنىن ەسكە سالادى. بانكنوتتاردا بەدەر تۋدىراتىن ارنايى ءمور بار.
سول سياقتى بارلىق بانكنوتتاردا كورۋ قابىلەتى ناشار ادامدارعا ارنالعان، قولمەن ۇستاعاندا جاقسى بىلىنەتىن دوڭەس ءتارىزدى جوعارى بەدەرلى ەلەمەنت تۇرىندەگى بەلگىلەر بار.
بانكنوتتىڭ ءتۇسى انىق جانە كونتراستىلى بولۋعا ءتيىس، سۋ تاڭباسى مەن نومينالدىڭ سيفرلىق بەينەسىن كورۋ ءۇشىن بانكنوتتى جارىققا باعىتتاپ كورۋ قاجەت.
بانكنوت بەتىندەگى جازۋلارى بار تۇتاس ءجىپ تارىزدەس، جارىقتا انىق كورىنەتىن جازۋلار بار ۇزىك سىزىق تۇرىندەگى تۇتاس ماگنيتتىك جانە سۇڭگۋىر جىپكە دە نازار اۋدارعان ءجون.
نومينالى 1 000، 2 000، 5 000، 10 000 جانە 20 000 تەڭگەلىك بانكنوتتاردا ءتۇرلى-تۇستى بوياۋمەن سالىنعان سۋرەت تۇرىندەگى بەينەلەر بار. بانكنوتتىڭ كولبەۋ بۇرىشى وزگەرگەن كەزدە بەينەلەردىڭ ءتۇسى جاسىلدان التىن تۇسكە دەيىن وزگەرەدى.
كۋپيۋرانى وسى ادىسپەن تەكسەرۋگە بىرنەشە مينۋت ۋاقىت كەتەدى جانە ول بانكنوتتىڭ ءتۇپنۇسقاسىن انىقتاۋعا كومەكتەسەدى. شىن اقشانى جالعان بانكنوتتان قالاي اجىراتۋعا بولاتىنى تۋرالى اقپاراتپەن قازاقستان ۇلتتىق بانكىنىڭ سايتىندا تولىعىراق تانىسۋعا بولادى.