جۇيەلى جۇمىس جۇرگىزىلىپ جاتىر.
قازاقستان ۇكىمەتى ۇلتتىق بىلىكتىلىك جۇيەسىن دامىتۋ بويىنشا جۇيەلى جۇمىس جۇرگىزىپ جاتىر، دەپ حابارلايدى Almaty-akshamy.kz.
«ق ر ەڭبەك جانە حالىقتى الەۋمەتتىك قورعاۋ مينيسترلىگى مەملەكەت باسشىسىنىڭ قىزمەتكەرلەردى قۇزىرەتتەردى تۇراقتى ارتتىرۋعا ىنتالاندىرۋ جانە ولاردىڭ بىلىكتىلىكتەرىن تانۋ ماسەلەلەرىن رەتتەۋ جونىندەگى تاپسىرماسىن ورىنداۋ شەڭبەرىندە ۇلتتىق بىلىكتىلىك جۇيەسىن دامىتۋ بويىنشا جۇيەلى جۇمىس جۇرگىزۋدە»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
قازاقستاندىق قوعامنىڭ دامۋ ۇردىستەرى، ءوندىرىستىڭ جاڭا تۇرلەرىنىڭ جانە جۇمىسپەن قامتۋ تۇرلەرىنىڭ پايدا بولۋى ەكونوميكانىڭ ءتۇرلى باعىتتارىندا بىلىكتى كادرلارعا جاڭا سۇرانىس قالىپتاستىرادى. جۇمىس بەرۋشىلەر تاراپىنان دايىندىق دەڭگەيى مەن داعدىلارعا قويىلاتىن تالاپتاردىڭ ارتۋى كوبىنەسە جۇمىسقا ورنالاسۋعا مۇقتاج مامانداردىڭ كاسىبي قۇزىرەتتەرىنە سايكەس كەلمەيدى.
ەڭبەك نارىعىنىڭ تەڭگەرىمدىلىگىن جانە مامانداردىڭ بىلىكتىلىگىنىڭ جۇمىس بەرۋشىلەردىڭ سۇرانىسىنا سايكەستىگىن رەتتەۋ ءۇشىن كاسىپتىك ستاندارتتاردى ازىرلەۋ جانە وزەكتەندىرۋ جۇرگىزىلۋدە. بۇدان ءارى ولار مامانداردى دايارلاۋ، قايتا دايارلاۋ جانە بىلىكتىلىگىن ارتتىرۋ ءۇشىن ءبىلىم بەرۋ مەكەمەلەرىنىڭ وقۋ باعدارلامالارىن ازىرلەۋ ءۇشىن پايدالانىلاتىن بولادى.
كاسىپتىك ستاندارتتاردى ازىرلەۋ جانە قايتا قاراۋ بويىنشا جوبالاۋ كوماندالارىن ۇيلەستىرۋ، ءادىسنامالىق قولداۋ جانە سۇيەمەلدەۋ ماقساتىندا «ەڭبەك رەسۋرستارىن دامىتۋ ورتالىعى» اق بازاسىندا وسى جىلدىڭ مامىر ايىندا بارلىق سالالىق مەملەكەتتىك ورگانداردى، «اتامەكەن» ۇكپ مەن جۇمىس بەرۋشىلەر قاۋىمداستىعىن تارتا وتىرىپ، ۇبج دامىتۋ جونىندەگى جوبالاۋ كەڭسەسى قۇرىلدى.
«2022-2025 جىلدار ارالىعىندا ەكونوميكانىڭ باسىم سالالارىن: ءبىلىم بەرۋ، دەنساۋلىق ساقتاۋ، ونەركاسىپ، الەۋمەتتىك سالا، كولىك جانە لوگيستيكا، تۋريزم، قۇرىلىس جانە ت. ب. وزەكتى كاسىبي ستاندارتتارمەن قامتاماسىز ەتۋ بويىنشا ۇلكەن جۇمىس جۇرگىزۋ جوسپارلانۋدا. تالاپ ەتىلەتىن ماماندىقتار بويىنشا مامانداردى ساپالى دايارلاۋ ءۇشىن جوعارى وقۋ ورىندارى مەن كوللەدجدەردىڭ ءبىلىم بەرۋ باعدارلامالارى جاڭارتىلاتىن بولادى. «كاسىپتىك بىلىكتىلىكتەر تۋرالى» زاڭ جوباسىن ەسكەرە وتىرىپ، كاسىبي بىلىكتىلىكتەردى باعالاۋ جانە تانۋ جۇيەسى داميتىن بولادى»، – دەدى جوبالاۋ كەڭسەسىنىڭ باسشىسى ەراسىل جۇمانبايەۆ.
جوبالاۋ كەڭسەسى قىزمەتى شەڭبەرىندە ساراپشى-ادىسكەرلەردىڭ قاتىسۋىمەن مەملەكەتتىك ورگانداردىڭ جۇمىس توپتارىمەن كۇندەلىكتى كەزدەسۋلەر، سونداي-اق ەحاقم باسشىلىعىنىڭ توراعالىعىمەن باسقارۋشى كوميتەتتىڭ اپتا سايىنعى وتىرىستارى وتكىزىلەدى.