2022 جىلى قازاقستان مەن يران اراسىنداعى تاۋار اينالىمى $528 ملن-دى قۇرادى
ق ر پرەمەر-مينيسترى ءاليحان سمايىلوۆتىڭ يران يسلام رەسپۋبليكاسىنا رەسمي ساپارى اياسىندا 24-26 ءساۋىر ارالىعىندا تەگەراندا ەلىمىزدىڭ ءۇشىنشى ساۋدا-ەكونوميكالىق ميسسياسى وتۋدە، دەپ حابارلايدى Almaty-akshamy.kz.
«QazTrade» ساۋدا ساياساتىن دامىتۋ ورتالىعى ۇيىمداستىرعان شاراعا ق ر اۋىل شارۋاشىلىعى مينيسترلىگىنىڭ، ازىق-تۇلىك، حيميا، قۇرىلىس، جەڭىل ونەركاسىپ جانە مەتاللۋرگيا تاۋارلارىن وندىرەتىن قازاقستاندىق 20 كومپانيانىڭ، ەكى ەلدىڭ بىرلەسكەن ساۋدا پالاتاسىنىڭ، يراننىڭ ساۋدا-ونەركاسىپ، تاۋ-كەن جانە اۋىل شارۋاشىلىعى پالاتاسىنىڭ وكىلدەرى، سونداي-اق يراندىق تاراپتان 150-دەن استام كومپانيا وكىلدەرى قاتىستى.
ىسكەرلىك كەزدەسۋلەر ناتيجەسىندە قازاقستاننان يرانعا تىڭايتقىشتار، ماي ونىمدەرىن، ءىرى قارا جانە ۇساق مال ەتىن جەتكىزۋ بويىنشا $60 ملن-نان استام سوماعا ەكسپورتتىق كەلىسىمشارتتارعا قول قويىلدى.
ق ر ساۋدا جانە ينتەگراسيا ۆيسە-مينيسترى قايرات تورەبايەۆتىڭ ايتۋىنشا، 2022 جىلى قازاقستان مەن يران اراسىنداعى تاۋار اينالىمى $528 ملن-دى قۇرادى، بۇل – وتكەن جىلدىڭ سايكەس كەزەڭىمەن سالىستىرعاندا 19،8%-عا جوعارى. بۇل رەتتە قازاقستاندىق كومپانيالار ورتا مەرزىمدى پەرسپەكتيۆادا يرانعا جەتكىزىلىمدەردى ودان ءارى ارتتىرۋعا دايىن.
ساۋدا-ەكونوميكالىق ميسسيا اياسىندا يراندىق كومپانيالار قازاقستاندىق فوسفاتتى تىڭايتقىشتار، فەرروقورىتپالار جانە ازىق-تۇلىك ونىمدەرىن وندىرۋشىلەرگە جوعارى قىزىعۋشىلىق تانىتتى. ءوزارا ءتيىمدى قارىم-قاتىناستاردى ودان ءارى دامىتۋ تۋرالى كەلىسىمدەرگە قول جەتكىزىلدى.