قازاقستاندىق كاسىپكەر ەلدوس ايبەكوۆ افريكا قۇرلىعىنداعى اۋىز سۋعا مۇقتاج حالىققا قۇدىق قازىپ بەردى.
قازاقستان اتىنان سىيعا تارتىلعان قۇدىق ۋگاندا مەملەكەتىندەگى نانوكو ەلدى مەكەنىندە ورنالاسقان. ۋگاندانىڭ The Ngali Development Foundation (نگالي دامىتۋ قورى) كومپانياسىمەن بايلانىس ورناپ، ناتيجەسىندە قۇدىق قازۋ ءۇشىن ەكىجاقتى كەلىسىمگە كەلگەن، دەپ حابارلايدى Almaty-akshamy.kz
قۇدىقتىڭ قۇرىلىسى اقپان ايىندا باستالىپ، ناۋرىزدىڭ 12 كۇنى اياقتالدى. 13 ناۋرىزدا اشىلۋ سالتاناتى ۇيىمداستىرىلىپ، جەرگىلىكتى تۇرعىندار قازاقستاندىقتارعا العىستارىن ءبىلدىردى.
«ءبىز تازا سۋعا قول جەتكىزە الماي وتىرعان اۋىل تۇرعىندارىمىز. قاراپايىم تۇرمىس كەشەمىز. ازىن-اۋلاق ەشكى ۇستايمىز. ءقازىر سۋدى 5 كم جەردەگى وزەننەن تاسىپ ءىشىپ وتىرمىز. بۇل، ارينە، تازا سۋ ەمەس. مۇنىڭ ءبارىن بالالارىمىز تاسىپ اكەلەدى. موتوسيكل، ۆەلوسيپەدى بار ادامدار سيرەك. كوبىنە جاياۋ تاسيمىز. بالالاردىڭ قالاي قۋانعانىن كوردىڭىز بە؟! ولاردىڭ قۋانىشىن كورىپ، ءبىز دە ەرەكشە قۋانىپ تۇرمىز. ەلدوس مىرزاعا كوپ راقمەت. ءبىز قازاقستان دەگەن مەملەكەت جايلى مۇلدە بىلمەيتىن ەدىك. وسى جاعدايدان كەيىن ەشقاشان ۇمىتپاستاي بولدىق. ءقازىر بولعان قۋانىشتى كورگەن بالالار قازاقستاندى، كوك تۋلارىڭىزدى ماڭگى جادىندا ساقتاپ قالارى انىق. قازاقستانعا سالەم!» – دەدى نانوكو تۇرعىنى سووكا شاريف.
كاسىپكەردىڭ ايتۋىنشا، قۇدىق قازۋعا قاتىستى ەكى تاڭداۋ بولعان.
«قۇدىق قازۋعا قاتىستى بىزدە ەكى تاڭداۋ بولدى. ءبىرى – ۋگاندا، ەكىنشىسى – كەنيا. ەكەۋى دە شىعىس افريكادا ورنالاسقان. العاشىندا قۇدىقتى كەنيادان قازامىز دەپ ويلادىق. ويتكەنى، كەنياداعى قىزمەتتىڭ باعاسى ۋگانداعا قاراعاندا ارزان بولدى. كەيىن قوس مەملەكەتكە اناليز جاساپ، ۋگاندانىڭ ءجىو-سى كەنيادان 3 ەسە تومەن ەكەنىن كوردىك. ويلانا كەلە، قۇدىقتى تازا سۋعا شىن مۇقتاج حالىققا قازىپ بەرەيىك دەگەن قورىتىندىعا كەلدىك. بۇگىن قۇدىعىمىزدى قولدانىسقا بەردىك. تۇرعىنداردىڭ، بالالاردىڭ قۋانىشىن كورىپ ەرەكشە تولقىنىستى كۇي كەشتىم. بۇل جوبامىز قازاقستان مەن ۋگاندا مەملەكەتتەرىنىڭ اراسىنداعى بايلانىستى نىعايتا تۇسەدى دەگەن سەنىمدەمىز»، – دەدى ول.
ەلدوس ايبەكوۆ تمد بيزنەس نارىعىندا 15 جىلعا جۋىق كاسىپپەن اينالىسىپ كەلەدى. ول وسى ۋاقىتقا دەيىن جالپى قۇنى 15 ملن تۇراتىن دسپ-ناۋقاستارىنا ارنالعان اپپاراتتاردى تەگىن تاراتقان. اي سايىن الەۋمەتتىك تۇرمىسى تومەن وتباسىلارعا ازىق-تۇلىك، ماتەريالدىق، قارجىلىق كومەك كورسەتەدى.
