قازاقستاندا قولما-قول اقشاسىز وپەراسيالار سانى ارتىپ كەلەدى

اقشاسىز وپەراسيالاردىڭ سانى مەن كولەمى 5،4 ترلن تەڭگە سوماسىنا 438،5 ملن ترانزاكسيانى قۇرادى.

قازاقستاندا قولما-قول اقشاسىز وپەراسيالار سانى ارتىپ كەلەدى. بۇل تۋرالى بۇگىن ۇكىمەت وتىرىسىندا ق ر ۇلتتىق بانك ءتوراعاسى عالىمجان ءپىرماتوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«بيىلعى جىلدىڭ قاڭتار ايىندا ۇلتتىق بانك تولەم جۇيەلەرى ارقىلى 52،5 ترلن تەڭگە سوماسىنا 4،2 ملن ترانزاكسيا جۇرگىزىلدى. ورتاشا العاندا، ءبىر كۇندە تولەم جۇيەلەرى ارقىلى 2،9 ترلن تەڭگە سوماسىنا 232،5 مىڭ ترانزاكسيا ورىن الدى. 2022 جىلعى قاڭتاردا قولما-قول اقشاسىز وپەراسيالاردىڭ سانى مەن كولەمى 5،4 ترلن تەڭگە سوماسىنا 438،5 ملن ترانزاكسيانى قۇرادى»، - دەدى ول. 

عالىمجان ءپىرماتوۆتىڭ ايتۋىنشا، قازاقستاندىق بانكتەردىڭ ەل ىشىندە كليەنتتىك جانە مەنشىكتى تولەمدەر مەن اقشا اۋدارىمدارىن جۇرگىزۋ بويىنشا بارلىق وپەراسيالارى شتاتتىق رەجيمدە جۇزەگە اسىرىلۋدا.

«ۇلتتىق بانك ناقتى ۋاقىت رەجيمىندە جاعدايدىڭ دامۋىن جانە ولاردىڭ نارىقتارعا ىقپالىن قاداعالاپ وتىرادى. قازاقستاننىڭ قارجى جۇيەسىنە رەسەيگە قارسى سانكسيالاردىڭ اسەر ەتۋ دارەجەسىن باعالاپ، قارجى جانە باعا تۇراقتىلىعىن قامتاماسىز ەتۋ ءۇشىن ءىس-شارالار قابىلداۋدى جالعاستىرادى»، - دەدى ۇلتتىق بانك ءتوراعاسى.