قازاقستاندىق جازۋشىلاردىڭ دەتەكتيۆ شىعارمالارى ءبىر كىتاپقا توپتاستىرىلادى

دەتەكتيۆ جانرىنداعى شىعارمالار ءبىر جيناققا توپتاستىرىلادى. 

ىشكى ىستەر مينيسترلىگى باسپا ءسوز قىزمەتىنىڭ وكىلى شۇعىلا تۇرلىبەك قازاقستاندىق قالامگەرلەردىڭ دەتەكتيۆ جانرىنداعى شىعارمالارى كىتاپ بولىپ باسىلىپ شىعاتىنىن ايتتى، دەپ حابارلايدى Almaty-akshamy.kz Egemen.kz-كە سىلتەمە جاساپ. 

«وتكەن جىلى ىشكى ىستەر مينيسترلىگى ەل تاريحىندا تۇڭعىش رەت «سەرت» دەتەكتيۆ شىعارمالارىنىڭ رەسپۋبليكالىق بايقاۋىن وتكىزگەن بولاتىن. ادەبي بايقاۋدىڭ باستى ماقساتى – حالىقتىڭ قۇقىقتىق مادەنيەتىن، سونىمەن قاتار قازاقستاندىق ءپاتريوتيزمدى ارتتىرۋ، قوعام نازارىن پوليسيا مەن باسقا دا قۇقىق قورعاۋ ورگاندارى قىزمەتكەرلەرىنىڭ قيىن جانە ءقاۋىپتى جۇمىسىنا اۋدارۋ»، - دەدى شۇعىلا تۇرلىبەك بريفينگ بارىسىندا.

ونىڭ ايتۋىنشا، ىشكى ىستەر مينيسترلىگى قازاقستان پوليسياسىنىڭ 30 جىلدىق مەرەيتويى اياسىندا رەسپۋبليكالىق «سەرت» بايقاۋىن جاريالادى. بايقاۋعا قاتىساتىن شىعارمالار وسى جىلدىڭ 15 قىركۇيەگىنە دەيىن قابىلدانادى.

«ىشكى ىستەر مينيسترلىگى بايقاۋعا قاتىسۋعا شاقىرادى. جەڭىمپازدار قازاقستاننىڭ تاۋەلسىزدىك كۇنىنە وراي جاريالانادى. ال بايقاۋ قورىتىندىسى بويىنشا دەتەكتيۆ جانرىنداعى قازىرگى زامانعى قازاقستاندىق جازۋشىلاردىڭ شىعارمالارى جيناقتالعان كىتاپ باسىلادى»، - دەدى ءىىم وكىلى.