ازيانىڭ 14 ەلىنەن كەلگەن ماماندار جاڭا تۇقىم تۇرلەرىن زەرتتەۋدەگى جەتىستىكتەرىمەن ءبولىستى.
مادەني وسىمدىكتەردى وسىرۋمەن اينالىساتىن قازاقستاندىق عالىمداردىڭ دا جاڭالىقتارى از ەمەس. حالىقارالىق تاجىريبەنى زەردەلەگەن ماماندار جاڭا جىلدان باستاپ تۇقىمداردىڭ سيفرلىق اقپاراتتىق جۇيەسىن ەنگىزىپ، ەلىمىزدىڭ فەرمەرلەرىن جاڭا تۇقىم تۇرلەرىمەن قامتاسىز ەتۋدى جوسپارلاپ وتىر، دەپ حابارلايدى Almaty-akshamy.kz 24.kz-كە سىلتەمە جاساپ.
«شەتەلدىك كومپانيالاردى اۋىل شارۋاشىلىعى داقىلدارىنىڭ وتاندىق سەلەكسياسى مەن تۇقىم شارۋاشىلىعىنا ينۆەستيسيا سالۋعا ىنتالاندىراتىن شارالاردىڭ ءبىرى – قازاقستاننىڭ وسىمدىكتەردىڭ جاڭا سورتتارىن قورعاۋ جونىندەگى حالىقارالىق وداققا قوسىلۋى. بۇل باعىتتا جۇمىستار جۇرگىزىلۋدە. وزدەرىڭىز كورىپ وتىرعانداي، قازاقستاندىق تۇقىم شارۋاشىلىعىنىڭ الدىندا ۇلكەن مىندەتتەر تۇر جانە كورەيادا ءوتىپ جاتقان ازياداعى تۇقىم شارۋاشىلىعىن دامىتۋ ەكى اپتالىق ترەنينگ تۇقىم شارۋاشىلىعىنىڭ الەمدىك ۇردىستەرىن تۇسىنۋگە مۇمكىندىك بەردى. ترەنينگ اياسىندا ءبىز تۇقىم شارۋاشىلىعىنىڭ وتە زاماناۋي پروسەسىمەن تانىستىق»، - دەيدى ق ر اۋىل شارۋاشىلىعى مينيسترلىگى ەگىنشىلىك دەپارتامەنتى ساراپشىسى مەرۋەرت جۋاندىقوۆا.