ماماندار جىلىتۋ ماۋسىمىنا دايىندىعى تۋرالى ايتتى.
الماتى قالاسىنىڭ ءبىلىم بەرۋ، دەنساۋلىق ساقتاۋ جانە تۇرعىن ءۇي قورى وبەكتىلەرىنىڭ قىسقى جىلىتۋ كەزەڭىنە دايىندىعى 100%-دى قۇرايدى، دەپ حابارلايدى Almaty-akshamy.kz.
كوممۋنالدىق قىزمەتتەر الداعى جىلىتۋ ماۋسىمىنا دايىندىقتى اعىمداعى جىلدىڭ مامىر ايىندا باستادى، جۇمىستار بەكىتىلگەن كەستەگە سايكەس جۇرگىزىلدى. 413 ءبىلىم بەرۋ، 129 دەنساۋلىق ساقتاۋ وبەكتىسى جانە 8 476 تۇرعىن ءۇي قورىنىڭ وبەكتىسى دايىندالدى. «الماتىجىلۋجاينەرگو» ج ش س قازاندىقتارىندا كومىر مەن مازۋتتىڭ قورى 100%-دى قۇرايدى. «الەس» اق (جەو-1،2، بجك) ەنەرگيا كوزدەرىندە كومىر قورى 118%-دى جانە مازۋت 118%دى قۇرايدى.
سونداي-اق، اعىمداعى جانە جوسپارلى جۇمىستار، ونىڭ ىشىندە توزۋدى تومەندەتۋ ماقساتىندا قولدانىستاعى جەلىلەردى رەكونسترۋكسيالاۋ جۇمىستارى ورىندالدى.
جىلىتۋ ماۋسىمىن دايىنداۋ جانە وتكىزۋ قاعيدالارىنا سايكەس قالانى جىلۋ جۇيەسىنە قوسۋ سىرتقى اۋانىڭ بەلگىلەنگەن ورتاشا تاۋلىكتىك تەمپەراتۋراسى +8°س جانە ودان تومەن بولعاندا بەس تاۋلىكتىڭ ىشىندە جۇرگىزىلەدى.
ءبىرىنشى كەزەكتە جىلۋعا دەنساۋلىق ساقتاۋ، ءبىلىم بەرۋ عيماراتتارى جانە وزگە دە الەۋمەتتىك وبەكتىلەر قوسىلاتىن بولادى. سودان كەيىن جىلۋ كوپ پاتەرلى تۇرعىن ۇيلەرگە بەرىلەدى.