قازاقستاندىق فوتوسۋرەتشى حالىقارالىق بايقاۋلاردى باعىندىرۋدا

حالىقارالىق فوتوشارالاردا قازاقستاندىق فوتوسۋرەتشىنىڭ ەڭبەكتەرى ۇلكەن سۇرانىسقا يە.

الەكساندر ۆلاسيۋكتىڭ قايتالانباس ساتتەردى قالت جىبەرمەي ساقتاپ قالۋ قامىندا قولعا العان سۇيىكتى ءىسى. اۋەستىگىن ومىرلىك حوببيگە اينالدىرعان وتاندىق فوتوسۋرەتشى - ءبىرقاتار بەدەلدى بايقاۋلاردىڭ جەڭىمپازى. جاقىندا «Kazakhstan Diagamma 2022» سىنىندا شەبەرلىك بايقاسقان 260-قا جۋىق قاتىسۋشىنىڭ الدىن وراپ، توپ جاردى، دەپ حابارلايدى Almaty-akshamy.kz Qazaqtv.com-عا سىلتەمە جاساپ.

بۇل از دەسەڭىز، حالىقارالىق فوتوسۋرەت ونەرىنىڭ فەدەراسياسى جانە امەريكالىق فوتوسۋرەت قوعامنىڭ بەلدى شاراسىندا ونىڭ «بالقاش»، «جاعاجاي ماۋسىمى» جانە «سوۆەنوك گرەي» جۇمىستارى ەكى التىن القا قانجىعالاپ، قۇرمەت لەنتاسى تاعىلدى.  

"مەن 14 سۋرەت جىبەردىم. ولاردىڭ ىشىنەن 12 جۇمىسىم ىرىكتەلىپ، ۇشەۋى ماراپاتقا يە بولدى. بۇل تەك ءوزىڭنىڭ بابىڭدى سىناپ، وزگە قاتىسۋشىلارمەن شەبەرلىك الماسۋ ءۇشىن قاجەت بولدى. ويتكەنى، ول جەردە الەمنىڭ ءار جەرىنەن كەلگەن ەڭبەكتەر قويىلدى. ءوزىمدى تانىتىپ، باعالاۋ ءۇشىن قاتىستىم"، - دەيدى فوتوسۋرەتشى الەكساندر ۆلاسيۋك.   

الەكساندر قورشاعان ورتانىڭ ەرەكشەلىگىن سۋرەتكە ءتۇسىرۋدى ۇناتادى. ول ءۇشىن ەل ارالاپ، تابيعات اياسىندا ساياحاتقا ءجيى شىعىپ تۇرادى. ونىڭ ايتۋىنشا، فوتونىڭ ءساتتى شىعۋى اۋا رايى مەن تابيعي جارىققا تىكەلەي قاتىستى. ءبىر جەردىڭ ءوزى تابيعاتتىڭ تىلسىم مىنەزىنە بايلانىستى ءار كەز وزگە قىرىنان تانىلادى، دەيدى ول. 

ءوز ءىسىنىڭ حاس شەبەرى ءىزىن باسقان دارىندى جاس فوتوسۋرەتشىلەر كوپ ەكەنىن ايتادى. سيقىرلى فوتو الەمىنە ەندى اياق باسقاندارعا قاتەلىكتەرگە مويىماي ساباق الىپ، بىلىكتىلىكتى شىڭداۋدان تالماۋ كەرەك دەگەن كەڭەس بەرەدى.