قازاقستاندىق رەجيسسەر ايجان قاسىمبەكتىڭ «ءمادينا» اتتى دراماسى Alternativa Film Awards 2024 حالىقارالىق كينوجۇلدەسىنىڭ شورت-تىزىمىنە ەندى.
ماراپاتتاۋ ءراسىمى 29 قاراشادا يندونەزيانىڭ دجوكياكارتا قالاسىندا وتەدى، دەپ حابارلايدى aqshamnews.kz El.kz اقپارات اگەنتتىگىنە سىلتەمە جاساپ.
Alternativa Film Awards by inDrive – ءتۇرلى ەلدەردىڭ كينويندۋستريا ماماندارىنىڭ تانىلۋىنا جانە ءوزارا تاجىريبە الماسۋىنا مۇمكىندىك بەرەتىن حالىقارالىق كوشپەلى باستاما. بۇل جۇلدە قوعامعا وڭ الەۋمەتتىك وزگەرىستەر اكەلە الاتىن جانە كوپشىلىك اۋديتورياعا ارنالعان فيلمدەردىڭ تانىلۋىنا مۇمكىندىك بەرەدى.
شورت-تىزىمگە ازيانىڭ 14 ەلىنەن جالپى سانى 25 فيلم ەندى. ونىڭ ىشىندە 13 تولىقمەتراجدى جانە 12 قىسقامەتراجدى تۋىندى بار. ورتالىق ازيانىڭ ابىرويىن ەكى فيلم قورعاپ وتىر: قازاقستاندىق «ءمادينا» جانە قىرعىز رەجيسسەرى دالميرا تىلەپبەرگەننىڭ «بەلەك» ءفيلمى.
ءفيلمدى تۇسىرۋگە ءتورت جىل ۋاقىت قاجەت بولدى. ءبىزدىڭ تۇپكى ماقساتىمىز – قازاقستاندا كولەڭكەدە ءجيى قالىپ قوياتىن ايەلدەر مەن بالالار ماسەلەسىن كوپشىلىككە جەتكىزۋ ەدى. ءتۇسىرىلىم باسىندا ءوزىمدى دارمەنسىز سەزىندىم. ەشقانداي قولداۋ بولمادى، فيلم ەشكىمگە كەرەك ەمەستەي كورىندى، ءتىپتى فيلم اياقسىز قالىپ قويا ما دەپ قورىقتىم. ءبىز قوزعاعان تاقىرىپتار قوعامدا ءالى كۇنگە دەيىن تابۋ سانالادى. ءبىراق وسى ءتورت جىلدا كوپ نارسە وزگەردى – قازاقستاننىڭ بۇرىنعى ەكونوميكا ءمينيسترى بولعان كۇيەۋىنىڭ قولىنان قايتىس بولعان سالتانات نۇكەنوۆانىڭ ورنى تولماس قازاسى قوعامدى تۇرمىستاعى زورلىق-زومبىلىق تۋرالى اشىق ايتۋعا يتەرمەلەدى. ايەلدەر ەندى ءۇنسىز قالا المايدى، ال پرەزيدەنت بۇل ماسەلەنى جەڭۋ ءۇشىن جاڭا زاڭدارعا قول قويدى. ءبىزدىڭ فيلم – وسى وزگەرىستەر تۋرالى، ماحابباتپەن جانە ءۇنسىز قالۋعا بولمايدى دەگەن سەنىممەن باياندالعان وقيعا، – دەيدى رەجيسسەر ايجان قاسىمبەك.
حالىقارالىق قازىلار القاسىنىڭ قۇرامىنا قازاقستاندىق دەرەكتى فيلم رەجيسسەرى كاتەرينا سۋۆوروۆا كىردى. ونىڭ «Qoryqpa» ءفيلمى وتكەن جىلعى جۇلدەدە ماراپاتقا يە بولعان. كاتەرينامەن بىرگە فيلمدەردى ءۇندىستان، يندونەزيا، گەرمانيا، برازيليا جانە يراننىڭ تانىمال كينەماتوگرافيستەرى باعالايدى.
ءبىز فيلمدەردىڭ كوركەمدىك جانە كينەماتوگرافيالىق ارتىقشىلىقتارىن عانا ەمەس، ولاردىڭ ءوز قاۋىمداستىقتارىنا جەتكىزگىسى كەلگەن ءمانىن جانە وسى كەڭ دە كۇردەلى الەمدەگى بارشامىزعا بەرەر اسەرىن دە ەسكەرۋىمىز كەرەك. وتكەن جىلعى فەستيۆال باعدارلاماسىنىڭ العاشقى كەزەڭى مەنىڭ تۋعان قالام الماتىدا ءوتتى. بۇل مەن ءۇشىن جەڭىسپەن عانا ەمەس، قوعامدى جاقسارتۋعا باعىتتالعان فيلمدەردى قولداۋ يدەياسىمەن ەستە قالعان جارقىن وقيعا بولدى. كوشپەلى جۇلدەنىڭ باسقا ەلدە قايتا جارىق كورىپ، جالعاسىن تاپقانىن كورۋ ماعان شابىت سىيلايدى، – دەدى قازىلار القاسىنىڭ مۇشەسى، قازاقستاندىق رەجيسسەر كاتەرينا سۋۆوروۆا.
شورت-تىزىمگە ەنگەن بارلىق فيلم 22-28 قاراشا ارالىعىندا دجوكياكارتادا وتەتىن Alternativa Film Festival اياسىندا كورسەتىلەدى. ماراپاتتاۋ راسىمىنە دەيىنگى ماڭىزدى وقيعالاردىڭ ءبىرى – 27-29 قاراشادا وتەتىن Industry Days كاسىبي باعدارلاماسى. بۇل شارادا كينەماتوگرافيستەر ءارتۇرلى ەلدەردەن كەلگەن ارىپتەستەرىمەن ءوزارا تاجىريبە الماسادى.
ماراپاتتاۋ ءراسىمىن بۇۇ-نىڭ گەندەرلىك تەڭدىك ماسەلەلەرى جونىندەگى ەلشىسى، بريتان-يندونەزيالىق اكتريسا ءارى بەلسەندى حاننا ال راشيد جۇرگىزەدى.