بۇل فيلم قازاقستاندا 14 ساۋىردەن باستاپ پروكاتقا شىقتى.
برازيليادا وتكەن Olhar de Cinema حالىقارالىق كينوفەستيۆالىندە رەجيسسەر دارەجان ومىربايەۆتىڭ «اقىن» ءفيلمى «باسقا كوزقاراستار» بولىمىندە «ۇزدىك فيلم» جۇلدەسىن جەڭىپ الدى، دەپ حابارلايدى Almaty-akshamy.kz
فەستيۆالدىڭ «باسقا كوزقاراستار» بولىمىندە 10 ەلدەن نەبارى 8 فيلم ۇسىنىلعان ەدى. بۇل بولىمدە الەمدىك كينەماتوگرافيانىڭ جاڭالىقتارى مەن باسقا فەستيۆالدەردە تانىمال بولعان فيلمدەر كورسەتىلدى.
«اقىن» ءفيلمىنىڭ قازاقستاننان سوناۋ الىستاعى برازيليادا، پلانەتامىزدىڭ ارعى بەتىندە كورسەتىلىپ، قابىلدانىپ جاتقانىنا وتە قۋانىشتىمىن. بۇل جەڭىس فيلم تۇسىرگەندە وزىڭە شىنشىل بولساڭ، سوعان بار كۇشىڭدى جۇمساساڭ، تۋىندىنى ءبارى تۇسىنەتىنىن تاعى ءبىر دالەلدەيدى. بۇكىل كينو توبىن وسى باعالى جۇلدەنى يەلەنۋىمەن قۇتتىقتايمىن. جاڭا جەڭىستەردى كۇتەمىز، – دەدى دارەجان ومىربايەۆ.
سونىمەن قاتار «اقىن» ءفيلمى پاريجدەگى جورج پومپيدۋ اتىنداعى زاماناۋي ونەر مۋزەيىندە كورسەتىلەدى. وندا بەرلين كينوفەستيۆالىنىڭ ۇزدىك فيلمدەرى كورسەتىلەتىنىنى تۋرالى ءفيلمنىڭ پروديۋسەرى يۋليا كيم حابارلادى.
La Berlinale à Paris باعدارلاماسىن بەرلينالەنىڭ كوركەمدىك جەتەكشىسى كارلو چاتريان جانە پومپيدۋ مۇراجايىنىڭ ديرەكسياسى قۇراستىرعان. شوۋلار 10-26 ماۋسىم ارالىعىندا وتەدى.
ق ر مادەنيەت جانە سپورت مينيسترلىگىنىڭ تاپسىرىسىمەن تۇسىرىلگەن قازاق ءفيلمى 18 ماۋسىم كۇنى جەرگىلىكتى ۋاقىت بويىنشا ساعات 17:00-دە كورسەتىلەدى.
ايتا كەتەيىك، «اقىن» ءفيلمى Berlinale Forum حالىقارالىق كينوفەستيۆالىندە جۇلدە العان ەدى. بۇل فيلم قازاقستاندا 14 ساۋىردەن باستاپ پروكاتقا شىقتى. شاكەن ايمانوۆ اتىنداعى «قازاقفيلم» اق تۇسىرگەن «اقىن» ءفيلمى تەحنولوگيالار دامىعان قازىرگى زاماندا ونەردىڭ قوعامدا الاتىن ورنى تۋرالى وي قوزعاپ، پوەزياعا سۇرانىس ازايعان داۋىردە اقىننىڭ كۇيىنىشى تۋرالى سىر شەرتەدى.