ۇكىمەتتە ۆيسە-پرەمەر سەرىك ءجۇمانعاريننىڭ توراعالىعىمەن كۇزگى دالا جۇمىستارى ماسەلەلەرى جونىندەگى جەدەل شتابتىڭ ءبىرىنشى وتىرىسى ءوتتى.
شتاب ۇزدىكسىز ەگىن جيناۋ ناۋقانىنا كەدەرگى كەلتىرەتىن تاكتيكالىق ماسەلەلەردى دەرەۋ شەشۋ ماقساتىندا قۇرىلعان، دەپ حابارلايدى aqshamnews.kz اۋىل شارۋاشىلىعى مينيسترلىگىنە سىلتەمە جاساپ.
اكىمدىكتەردىڭ، قارجى ينستيتۋتتارىنىڭ، مەملەكەتتىك ورگانداردىڭ، «بايتەرەك» ۇبح» اق جانە «قتج» ۇك» اق جۇمىسىن ۇيلەستىرۋ ۇكىمەتتىڭ باقىلاۋىمەن جۇزەگە اسىرىلاتىن بولادى. جاقىن ارادا اۋىل شارۋاشىلىعى مينيسترلىگى مەن «ازىق-تۇلىك كورپوراسياسى» اق وكىلدەرى جەرگىلىكتى جەرلەردە ەگىن جيناۋ جۇمىستارىن جەدەل باسقارۋ ءۇشىن وڭىرلەرگە بارادى. 23 تامىزدا ۆيسە-پرەمەر سەرىك جۇمانعارين ەلىمىزدىڭ نەگىزگى استىق ەگەتىن وڭىرلەرىنىڭ ءبىرى - اقمولا وبلىسىنا بارادى.
ق ر اشم 20 تامىزداعى جەدەل دەرەكتەرىنە سايكەس، ەلىمىزدە 2،2 ملن توننا استىق باستىرىلىپ، 1،1 ملن تونناسى جينالدى. ونداعى داقىلداردىڭ 76%-ى جاقسى، 22%-ى قاناعاتتانارلىق دەپ باعالانىپ وتىر. ەگىن جيناۋ قارقىنى بىلتىرعى جىلمەن سايكەس دەۋگە بولادى، ءبىراق تولاسسىز جاۋعان جاڭبىر جاپپاي جۇمىس ىستەۋگە جانە ءداندى داقىلداردىڭ تولىق پىسۋىنە كەدەرگى كەلتىرۋدە. وسىعان بايلانىستى جەدەل شتاب وتىرىسىندا وڭىرلەردى استىق كەپتىرۋ اگرەگاتتارىمەن جانە ولارعا ارنالعان وتىنمەن قامتاماسىز ەتۋ ماسەلەسى قارالدى.
اۋىل شارۋاشىلىعى ۆيسە-مينيسترى ازات سۇلتانوۆتىڭ ايتۋىنشا، بۇگىنگى تاڭدا نەگىزگى استىق ەگەتىن وڭىرلەردە تاۋلىگىنە جالپى قۋاتى 820،6 مىڭ توننا بولاتىن 1301 استىق كەپتىرۋ اگرەگاتى بار. وسى كەپتىرۋ اگرەگاتتارىنىڭ جۇمىسى ءۇشىن 61 مىڭ توننا ارزانداتىلعان ديزەل وتىنىنا وتىنىمدەر كەلىپ ءتۇستى. ءبىراق كەيبىر وبلىستاردا كەپتىرگىشتەر سۇيىتىلعان گازبەن جۇمىس ىستەيدى، سوندىقتان بۇل قوندىرعىلارعا ارزانداتىلعان گاز قاجەت.
ءوز كەزەگىندە پرەمەر-مينيستردىڭ ورىنباسارى س. جۇمانعارين ق ر اشم مەن ەم-گە كەپتىرۋ اگرەگاتتارى ءۇشىن قاجەتتى سۇيىتىلعان گاز كولەمىن ەسەپتەپ، فەرمەرلەردى ارزانداتىلعان وتىنعا كەزەكتە تۇرعاندار تىزىمىنە قوسۋدى تاپسىردى. سونداي-اق اكىمدىكتەرگە فەرمەرلەردىڭ ءموبيلدى كەپتىرۋ اگرەگاتتارىنا دەگەن قاجەتتىلىگىن ەسەپتەۋ، ال قارجى ينستيتۋتتارىنا اتالعان قۇرىلعىلاردى ساتىپ الۋدى سۋبسيديالاۋ مۇمكىندىگىن پىسىقتاۋ تاپسىرىلدى.
جاڭا استىقتى ىشكى نارىققا جانە ەكسپورتقا ۇزدىكسىز جەتكىزۋدى ۇيىمداستىرۋ، جىلجىمالى قۇرامدى جەدەل ۇيلەستىرۋ جانە باسقارۋ ءۇشىن اۋىل شارۋاشىلىعى، كولىك مينيسترلىكتەرى، ازىق-تۇلىك كورپوراسياسى، قتج جانە اكىمدىكتەر اپتا سايىن، ال جاپپاي ەگىن جيناۋ كەزەڭىندە – كۇن سايىن سەلەكتورلىق كەڭەستەر وتكىزەدى.