قازاقستاندىق ديزاينەر پاريجدەگى ءسان اپتالىعىنا قاتىستى

فرانسيا استاناسى مەن ەۋروپانىڭ باسقا دا ەلدەرىنىڭ شوۋرۋمدارىندا قازاقستاندىق كيىمدەر پايدا بولۋى مۇمكىن

پاريجدە وتكەن ءسان اپتالىعىندا ديزاينەر ايدانا وماروۆا «باقىت تۇستەرى» دەپ اتالاتىن توپتاماسىمەن ەل نامىسىن قورعادى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ. 

وسى سالا كاسىپقويلارىنىڭ ايتۋىنشا، ايدانا ءوز توپتاماسىندا كولەمدى كيىم، نەون تۇستەرى، ەرەكشە ءپىشىن سەكىلدى ءساننىڭ بۇكىل ترەندىن بارىنشا قولدانعان. «وسى پوديۋمدا ۇسىنىلعان كيىمدەر الداعى كۇز بەن قىس ماۋسىمدارىنا ارنالعان»، – دەيدى الەمدىك ديزاينەرلەر.

«كيىمدەردىڭ ەۋروپادا جانە وزگە ەلدەردە دە وزىندىك ورنى بار دەپ سانايمىن. بۇل برەند بىرنەشە مادەنيەتتى بىرىكتىرەدى، سەبەبى ءار ادام مۇندا وزىنە جاراساتىن زاتتاردى تابا الادى»، - دەيدى «Posture» اگەنتتىگىنىڭ نەگىزىن قالاۋشى، ستيليست كەينا.

«ءدال ءقازىر ديزاينەردىڭ ينستاگرامىن قاراپ وتىرمىن. جۇمىسى كەرەمەت، ءوزى دە وتە دارىندى ەكەن. وزگە ەلدەردىڭ ديزاينەرلەرى جەتىستىككە جەتۋ ءۇشىن پاريجگە كەلەتىنىنە ريزامىن»، - دەيدى راديوجۇرگىزۋشى مارسەلا سانتاماريا.