پرەمەر-مينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋ باستاعان قازاقستاندىق دەلەگاسيا بۇۇ ەسىرتكى قۇرالدارى جونىندەگى كوميسسياسىنىڭ 67ء-شى سەسسياسىنا قاتىستى.
كوميسسياعا 1000-نان استام دەلەگات، ونىڭ ىشىندە ءتۇرلى ەلدەردىڭ ەسىرتكىنىڭ زاڭسىز اينالىمىنا قارسى ءىس-قيمىل ماسەلەلەرىنە جەتەكشىلىك ەتەتىن ۆەدومستۆولارىنىڭ 100-دەن استام باسشىلارى قاتىستى، دەپ حابارلايدى Almaty-akshamy.kz Polisia.kz-كە سىلتەمە جاساپ.
سەسسيا بارىسىندا دەلەگاتتار الەمدىك ەسىرتكى پروبلەماسىمەن كۇرەسۋدىڭ كەشەندى ستراتەگياسى بويىنشا حالىقارالىق ىنتىماقتاستىق ماسەلەلەرىن تالقىلادى.
شاراعا ىشكى ىستەر مينيسترلىگىنەن ءمينيستردىڭ ورىنباسارى ايدوس رىسبايەۆ قاتىستى. ول ءوز سوزىندە قازاقستان ۇكىمەتىنىڭ ۇلتتىق، وڭىرلىك جانە حالىقارالىق دەڭگەيدە ەسىرتكىنىڭ زاڭسىز اينالىمىنا قارسى كۇرەس بويىنشا قابىلداپ جاتقان شارالارىنا نازار اۋداردى. شتاب-پاتەرى الماتىدا ورنالاسقان ورتالىق ازيا وڭىرلىك اقپاراتتىق ۇيلەستىرۋ ورتالىعىنىڭ ەسىرتكىنىڭ زاڭسىز اينالىمىنا قارسى كۇرەسكە ماڭىزدى ۇلەس قوساتىنىن حابارلادى.