قىزدىڭ وپەراسيادان كەيىنگى جاعدايى قاناعاتتانارلىق.

قىزىلوردا وبلىسىندا «اسقازاننىڭ تريحوبەزوارى» دياگنوزى قويىلعان كىشكەنتاي قىزعا وتا جاسالدى. حيرۋرگتار بالانىڭ اسقازانىنان سالماعى 1 كەلى، ال  ۇزىندىعى 34 سانتيمەتر بولاتىن شاشتى الىپ تاستادى، دەپ حابارلايدى Almaty-akshamy.kz Turkystan.kz سىلتەمە جاساپ. 

وبلىستىق كوپبەيىندى بالالار اۋرۋحاناسىنىڭ شۇعىل حيرۋرگيا ءبولىمىنىڭ مەڭگەرۋشىسى ءالىمجان تولەگەنوۆتىڭ ايتۋىنشا، ناۋقاس تابەتىنىڭ تومەندەۋىنە، ءىشتىڭ اۋىرۋىنا جانە جۇرەگىنىڭ اينۋىنا شاعىمدانعان.

«تەكسەرۋ كەزىندە ءبىز بالاقايدىڭ ىشىنەن ىسىك ءتارىزدى ءتۇزىلۋدى انىقتادىق. ءسويتىپ، وعان «اسقازاننىڭ الىپ تريحوبەزوارى» دەگەن دياگنوز قويىلدى. بىردەن دەرەۋ وتا جاساۋ تۋرالى شەشىم قابىلداندى»، – دەدى ءالىمجان تولەگەنوۆ.

حيرۋرگ تۇسىندىرگەندەي، تريحوبەزوار – اسقازانداعى بوگدە زات. ول قۇرىلىمى تىعىز ءبىر زاتقا جابىسىپ قالعان شاشتاردان تۇرادى. كىشكەنتاي بالالاردىڭ كەز كەلگەن زاتتى جۇتىپ قوياتىنى بەلگىلى. ۋاقىت وتە كەلە، ول اسقازاندى تولتىرادى. سالدارىنان ناۋقاس تاماق ىشە الماي قالادى، تابەتى دە بولمايدى.

«ءبىزدىڭ بولجامىمىز بويىنشا، بالا ءبىر جاستان باستاپ جەردەگى شاشتار مەن ءتۇرلى قىلشىقتاردى جەي باستاعان. قىزدىڭ وپەراسيادان كەيىنگى جاعدايى قاناعاتتانارلىق. ول كەم دەگەندە تاعى 10 كۇن دارىگەرلەردىڭ كۇتىمىندە بولادى»، – دەدى حيرۋرگ.