بۇل ستارتاپ - Astana Hub حالىقارالىق تەحنوپاركىنىڭ رەزيدەنتى.
اقش-تىڭ 40-تان استام ترانسپورتتىق كومپانياسى يننوۆاسيالىق ونىمگە قىزىعۋشىلىق تانىتىپ، ونىڭ ەكەۋى كوممەرسيالىق نەگىزدەگى كليەنتكە اينالسا، ۇشەۋى پيلوت اياسىندا ىنتىماقتاستىق ورناتتى، دەپ حابارلايدى aqshamnews.kz.
Call2action.ai — گەنەراتيۆتى جاساندى ينتەللەكت (GenAI) نەگىزىندەگى تاسىمال مەن لوگيستيكا سالالارىندا جۇمىسقا الۋ پروسەسىن اۆتوماتتاندىرۋ ءۇشىن ازىرلەنگەن الەمدەگى العاشقى شەشىم. ستارتاپ پايدالانۋعا دايىن SaaS-شەشىم ۇسىنىپ، جۇمىسقا الۋ پروسەسىن ىڭعايلى عانا ەمەس، ەكونوميكالىق تۇرعىدان ءتيىمدى ەتەدى.
جوبانىڭ باستاپقى گيپوتەزاسى ءوز تيىمدىلىگىن دالەلدەپ، كومانداعا قارقىندى تۇردە العا جىلجىپ، ترەكشندى ارتتىرۋعا ىقپال ەتتى. ناتيجەسىندە، ستارتاپ ينۆەستيسيالىق كەزەڭدى اشىپ، ۆەنچۋرلىق قورلار جانە بيزنەس-پەرىشتەلەرمەن كەلىسسوزدەر جۇرگىزۋدە. ولاردىڭ كەيبىرى جەرگىلىكتى ەدۆايزەر رولىندە بولىسىپ، ينۆەستور اتانۋدى جوسپارلاپ وتىر.
«اقش نارىعى قازاقستان نارىعىنان ءبىرشاما ەرەكشەلەنەدى، ءبىراق ءبىز تاسىمال مەن لوگيستيكا سالاسىنداعى جۇمىسقا الۋ پروسەسىن ترانسفورماسيالاۋ ءۇشىن زور الەۋەت كوردىك. Silicon Valley Residency Program باعدارلاماسىنا قاتىسۋىمىزدىڭ ارقاسىندا Astana Hub پەن سيفرلىق دامۋ مينيسترلىگىنىڭ قولداۋىمەن كرەمنيي القابىندا اكسەلەراسيادان ءوتىپ، بىرنەشە اي ىشىندە ايتۋلى ناتيجەلەرگە قول جەتكىزدىك: 40-تان استام ترانسپورتتىق كومپانيا قىزىعۋشىلىق تانىتتى، ولاردىڭ ەكەۋىمەن كەلىسىمشارتتار جاسالدى، ءۇش كومپانيا پيلوتتىق جوبالاردى ىسكە قوستى. بىزدە pre-seed كەزەڭى ءۇشىن الەۋەتتى ينۆەستورلار بار، سونداي-اق Persol Group پەن Mitsui Group سياقتى ءىرى جاپوندىق كورپوراسيالاردىڭ نازارىن اۋداردىق. مۇنداي سۇرانىستى ەسكەرە وتىرىپ، ءونىمىمىز بىرنەشە جىل ىشىندە ميلليارد دوللارلىق قۇنعا جەتەدى دەپ ۇمىتتەنەمىز»، — دەدى ەرسۇلتان دجۋساكينوۆ، Call2action.ai باس ديرەكتورى جانە نەگىزىن تەڭ قالاۋشى.
Call2action.ai كومانداسى اقش-تاعى يننوۆاسيالىق ورتالىقتارمەن ىنتىماقتاستىقتى دامىتۋدى جالعاستىرۋدا، ونىڭ ىشىندە نەگىزىن ورتالىق ازيادان شىققاندار قالاعان Silkroad Innovation Hub بار. ستارتاپ TechCrunch Disrupt پەن CESV 2024 سياقتى ەڭ ءىرى حالىقارالىق كورمەلەردە ءوز الەۋەتىن كورسەتىپ، جاھاندىق نارىقتا بولاشاعى زور ويىنشى رەتىندە تانىلدى. سونداي-اق Call2action.ai Mitsui Groupء-تىڭ 2025 جىلى باستالاتىن اكسەلەراسيالىق باعدارلاماسىنا ىرىكتەلدى.
ەسكە سالساق، بۇعان دەيىن ورتالىق ازيانىڭ 22 پەرسپەكتيۆتى ستارتابى، ونىڭ ىشىندە Call2action.ai دە بار، AlchemistX & Silicon Valley Residency Program اياسىندا كرەمنيي القابىندا اكسەلەراسيالىق باعدارلامالاردان ءوتۋ مۇمكىندىگىنە يە بولدى. بۇل باعدارلامالار Astana Hub جانە Silkroad Innovation Hub-تىڭ، ق ر سيفرلىق دامۋ مينيسترلىگىنىڭ، دۇنيەجۇزىلىك بانك پەن FPIP جوباسىنىڭ قولداۋىمەن جۇزەگە اسىرىلدى.