وقۋ-اعارتۋ ءمينيسترى جەكە ورتا ءبىلىم بەرۋ ۇيىمدارىنىڭ ءى رەسپۋبليكالىق كونفەرەنسياسى الاڭىندا پەداگوگيكالىق ۇجىمدارمەن، جەكە مەكتەپتەر قاۋىمداستىعىنىڭ باسشىلارىمەن جانە وكىلدەرىمەن كەزدەستى.
عاني بەيسەمبايەۆ كونفەرەنسيادا سويلەگەن سوزىندە مەملەكەت تاراپىنان ءبىلىم بەرۋ ۇيىمدارىنا مەنشىك نىسانىنا قاراماستان جان-جاقتى قولداۋ كورسەتىلىپ كەلە جاتقانىن اتاپ ايتتى، دەپ حابارلايدى aqshamnews.kz.
وقۋ-اعارتۋ مينيسترلىگىنىڭ مالىمەتىنشە، تەك بيىلعى جىلدىڭ وزىندە 250 مىڭ بالا ءبىلىم الاتىن جەكە مەكتەپتەرگە بيۋدجەتتەن 161 ملرد تەڭگە كولەمىندە قاراجات بولىنگەن.
«تاعى ءبىر ماڭىزدى قادامدى ايتا كەتۋىمىز كەرەك. ماجىلىستە بۇگىنگى تاڭدا ۇكىمەتتىڭ باستاماشىلىق ەتۋىمەن زاڭ جوباسى قارالىپ جاتىر، وندا جەكە مەكتەپتەردە ءبىلىم الاتىن الەۋمەتتىك وسال وتباسى بالالارىنا مەملەكەتتىك ءبىلىم بەرۋ تاپسىرىسى شەڭبەرىندە الەۋمەتتىك كومەك كورسەتۋ تۋرالى نورما بار. بۇل دەگەنىمىز، جەكە مەكتەپتەردە وقيتىن بالالارعا دا جالپىعا مىندەتتى ءبىلىم بەرۋ قورى ەسەبىنەن قاجەتتى وقۋ-قۇرالدارىن الۋعا قارجىلاي قولداۋ كورسەتىلەدى جانە ولار تەگىن ىستىق تاماقتاندىرۋمەن قامتىلادى. بۇل مەملەكەتتىڭ جەكە سەكتورعا قولداۋ كورسەتۋىنىڭ ايقىن دالەلى بولا الادى. ءبىلىم بەرۋ ۇيىمدارىنىڭ مەنشىك تۇرىنە قاراماستان باستى مىندەتى – ەلىمىزدىڭ ساپالى ادامي كاپيتالىن قالىپتاستىرۋ. ءاربىر بالا ساپالى ءبىلىم الىپ، ءقاۋىپسىز ءارى جايلى ورتادا دامۋى كەرەك»، - دەدى مينيستر.
ەلىمىزدە 8 مىڭنان استام مەكتەپتە 3،9 ملن بالا ءبىلىم الىپ جاتىر. مەملەكەتتىڭ قولداۋىنىڭ ارقاسىندا سوڭعى ءۇش جىلدا جەكە مەكتەپتەردىڭ سانى 3 ەسە ارتتى. بۇگىندە 800-دەن استام جەكەمەنشىك مەكتەپتە 250 مىڭنان استام بالا وقۋدا.