قىتايدىڭ حانچجوۋ قالاسىندا ءوتىپ جاتقان ازيا ويىندارىندا قازاقستاندىق بوكسشى قامشىبەك قوڭقابايەۆ جارتىلاي فينالعا جولداما الدى.
قازاقستاندىق بوكسشى اسا اۋىر سالماق ساناتىندا باحرەيندىك دانيس لاتىپوۆپەن كۇش سىناستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قامشىبەك ءۇشىنشى راۋندتا نوكداۋن الىپ قالعانىنا قاراماستان، قارسىلاسىن ۇتتى. تورەشىلەر ەسەبى – 5:0.
وسىلايشا، ق.قوڭقابايەۆ كەمىندە قولا مەدال الادى.
بوكستان قازاقستان ەرلەر قۇراماسىنىڭ باس باپكەرى مىرزاعالي ايتجانوۆ قامشىبەكتىڭ جەكپە-جەگى تۋرالى پىكىر ءبىلدىردى.
"قارسىلاسى - ازياداعى مىقتىلاردىڭ ءبىرى. كەزدەسۋ تارتىستى بولدى. كەم-كەتىك تە بولماي قالعان جوق، بىر-ەكى سوققى جىبەرىپ الدى. مۇنىڭ ءبارى - الداعى كەزدەسۋلەرگە دايىندىق"، – دەدى ول.
بۇگىن جاينا شەكەربەكوۆا 54 كەلىگە دەيىنگى سالماقتا ءۇندىستاندىق پريتيگە 1:4 ەسەبىمەن جول بەرىپ، جۇلدەسىز قالدى.
كەشكى سەسسيادا قازاقستاننان تاعى ءۇش بوكسشى رينگكە شىعادى.