بالالارىنىڭ الدىندا قارىزى بارلار ەندى قازاقستان اۋماعىنان شىعا المايدى

اليمەنت تولەمەگەن 3 مىڭعا جۋىق بورىشكەر اكىمشىلىك جاۋاپكەرشىلىككە تارتىلدى.

بالالارىنىڭ الدىنداعى قارىزدارىن ءوندىرىپ الۋ ءۇشىن 2 مىڭنان استام جۇمىسسىز اليمەنتشى جۇمىسقا ورنالاستىرىلدى، دەپ حابارلايدى Almaty-akshamy.kz Elorda.info-عا سىلتەمە جاساپ.

بۇگىنگى تاڭدا 263 مەملەكەتتىك جانە 2111 جەكە سوت ورىنداۋشىسى جۇمىس ىستەيدى. ولاردىڭ وندىرىسىندە 20 ترلن تەڭگەگە جۋىق 7،2 ملن اتقارۋشى ءوندىرىس بار. اتقارۋشىلىق ءىس جۇرگىزۋدىڭ 40%-ى اياقتالدى. بۇل تۋرالى  ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا ادىلەت ءمينيسترى ازامات ەسقارايەۆ ايتتى.

ونىڭ ايتۋىنشا، اتالعان ساننىڭ ەداۋىر بولىگىن اليمەنت ءوندىرىپ الۋ جونىندەگى قۇجاتتار قۇرايدى. رەسپۋبليكا بويىنشا بۇل 303 مىڭنان استام نەمەسە ءوندىرىستىڭ 4% قۇرايدى.

«2023 جىلدىڭ 6 ايىندا اليمەنت تولەمدەرى بويىنشا سوت اكتىلەرىن ورىنداماعانى ءۇشىن 2 861 بورىشكەر اكىمشىلىك جاۋاپكەرشىلىككە تارتىلدى. 7 219 بورىشكەرگە قاتىستى ەلدەن شىعۋعا ۋاقىتشا تىيىم سالىندى. اليمەنت ءوندىرىپ الۋ تۋرالى بارلىق پروبلەمالىق اتقارۋشىلىق ءىس جۇرگىزۋ بويىنشا سوت ورىنداۋشىلارى ماجبۇرلەۋ سيپاتىنداعى شارالاردى قابىلداۋدا»، - دەدى ۆەدومستۆو باسشىسى.

ءمينيستردىڭ ايتۋىنشا، كەيدە ولار بورىشكەردەن اليمەنت ءوندىرىپ الا المايدى، ويتكەنى ونىڭ تۇراقتى تابىسى مەن مۇلكى جوق. وسىعان بايلانىستى، وڭىرلىك ادىلەت دەپارتامەنتتەرى اكىمدىكتەرمەن بىرلەسىپ بورىشكەرلەردى جۇمىسقا ورنالاستىرۋ ءۇشىن تۇراقتى نەگىزدە بوس جۇمىس ورىندارى جارمەڭكەسىن وتكىزەدى. مىسالى، 2023 جىلدىڭ 8 ايىندا رەسپۋبليكا بويىنشا 2 101 بورىشكەر جۇمىسقا ورنالاستىرىلدى.