قازاقستاندىق كاميل كۋرۋگلييەۆ ەركىن كۇرەستەن 17 جاسقا دەيىنگى جاسوسپىرىمدەر اراسىنداعى الەم چەمپيوناتىندا فينالعا شىقتى، دەپ حابارلايدى Almaty-akshamy.kz Inform.kz-كە سىلتەمە جاساپ.
الەم چەمپيوناتى يتاليا استاناسى ريم قالاسىندا ءوتىپ جاتىر. قازاقستاندىق بالۋان 30 شىلدەدە جارتىلاي فينالدا 92 كەلى سالماقتا اقش ەلىنىڭ وكىلى ماكسۆەلل رايان ماكەنەلليمەن كۇش سىناستى.
بەلدەسۋ بارىسىندا ول سەنىمدى ويىن كورسەتتى. ناتيجەسىندە قارسىلاسىنان 12:2 ەسەبىمەن باسىم ءتۇسىپ، فينالعا جولداما الدى.
ەندى ول 31 شىلدەدە فينالدا ۆەنگريالىق مۋسا اشرۋنكايەۆپەن تارتىسقا تۇسەدى. فينالدىق ويىندار ەلوردا ۋاقىتىمەن 21:00-دە باستالادى. سونداي-اق. ەل قۇراماسىنان نۇردانات ايتانوۆ (51 كەلى)سول كۇنى قولا جۇلدەگە تالاسادى.
ەسكە سالساق، بۇدان بۇرىن دزيۋدودان ازيا بىرىنشىلىگىنە قاتىساتىن قازاقستاندىق بالۋاندار انىقتالدى. سپورتشىلار 14 سالماقتا سىنعا تۇسەدى. ولاردىڭ قاتارىندا ەلىمىزدىڭ اتىنان قاتىساتىن 18 بالۋان بار.