نيۋ-يورك قالاسىندا ەكى كۇنگە سوزىلعان قاتتى اياز سالدارىنان سەگىز ادام قازا تاپتى، دەپ حابارلايدى Aqshamnews.kz ءتىلشىسى.
اقش-تا ايازدى داۋىلدان كەيىن ءبىرقاتار وڭىردە توتەنشە جاعداي بولعان. ۇلتتىق مەتەورولوگيالىق قىزمەتتىڭ (NWS) دەرەگىنە سايكەس، اۋا رايىنىڭ قولايسىزدىعىنا بايلانىستى مەكتەپتەر مەن جولدار جابىلىپ، اۋە رەيستەرى توقتاتىلعان. سونداي-اق مىڭداعان تۇرعىن جارىقسىز قالعان.
نيۋ-يورك مەرى زوحران مامداني بوراننىڭ باسىلۋى ءقاۋىپ تولىق ءوتتى دەگەندى بىلدىرمەيتىنىن ايتتى. ونىڭ سوزىنشە، قالاداعى باسپانالارعا قابىلداۋ تالاپتارى جەڭىلدەتىلىپ، مۇقتاج جانداردىڭ بارلىعى ورنالاستىرىلىپ جاتىر.
قالا بيلىگى «كوك كود» (Code Blue) رەجيمى ءالى دە كۇشىندە ەكەنىن مالىمدەدى. بيلىك وكىلدەرى سۋىقتان زارداپ شەگىپ جۇرگەن ادامداردى بايقاعان جاعدايدا 311 نومىرىنە حابارلاسۋعا شاقىردى.
وتكەن جىلعى رەسمي دەرەكتەرگە سايكەس، نيۋ-يورك كوشەلەرىندە ۇي-كۇيسىز ادامدار سانى 4،5 مىڭنان اسادى. كواليسيا وكىلى دەيۆ گيففەننىڭ ايتۋىنشا، ايازدى تۇندەردە ولار كوزگە تۇسە بەرمەيتىن جەرلەردى پانالايدى، سوندىقتان دەر كەزىندە كومەك كورسەتۋ قيىندايدى.
تەمپەراتۋرانىڭ ودان ءارى تومەندەۋىنە بايلانىستى قالا بيلىگى كومەك كورسەتۋ توپتارىنىڭ جۇمىسىن كۇشەيتىپ، تۇرعىنداردى باسپانالار مەن جىلىنۋ پۋنكتتەرىنە شاقىرۋدى جالعاستىرىپ جاتىر.