بەينەبايلانىس رەجيمىندە ۇجىمدىق قاۋىپسىزدىك تۋرالى شارت ۇيىمىنىڭ قورعانىس مينيسترلەرى كەڭەسى جانىنداعى جۇمىس توبىنىڭ وتىرىسى ءوتتى، دەپ حابارلايدى Almaty-akshamy.kz.
ۇقشۇ-نىڭ ۇجىمدىق كۇشتەرىن ماتەريالدىق-تەحنيكالىق جانە مەديسينالىق قامتاماسىز ەتۋ ماسەلەلەرىن تالقىلاۋعا قازاقستان رەسپۋبليكاسى قورعانىس ءمينيسترىنىڭ ورىنباسارى گەنەرال-لەيتەنانت مۇحامەدجان تالاسوۆ قاتىستى.
«ەشەلون-2022» ۇقشۇ جەدەل ارەكەت ەتۋ ۇجىمدىق كۇشتەرىن ماتەريالدىق-تەحنيكالىق قامتاماسىز ەتۋ كۇشتەرى مەن قۇرالدارىنىڭ ارنايى وقۋ-جاتتىعۋ قورىتىندىلارى تۋرالى قازاقستان رەسپۋبليكاسى قارۋلى كۇشتەرى تىل شتابىنىڭ باستىعى پولكوۆنيك نيكولاي ماسلوۆ بايانداما جاسادى.
كەزدەسۋگە قاتىسۋشىلار ۇقشۇ ۇجىمدىق كۇشتەرىن قالىپتاستىرۋدى قامتاماسىز ەتۋ ءۇشىن ماتەريالدىق قۇرالدار قورلارىن قۇرۋ جونىندە نورماتيۆتىك قۇجاتتاردى دايىنداۋ ماسەلەلەرىن، ۇيىم كونتينگەنتتەرى اراسىندا ماتەريالدىق قۇرالداردى بەرۋ بويىنشا ءوزارا ەسەپ ايىرىسۋ تارتىبىنە قاتىستى ۇسىنىمداردى قارادى.
وتىرىستا داعدارىستىق جاعدايلار تۋىنداعان كەزدە اسكەرلەر توپتارىن جەدەل ورنالاستىرۋ بارىسىندا اۋە كەمەلەرىنە قىزمەت كورسەتۋدى ۇيىمداستىرۋ ءۇشىن ماتەريالدىق قورلار قۇرۋ تۋرالى دا ايتىلدى.
ودان باسقا، اسكەري عىلىم سالاسىنداعى ىنتىماقتاستىق جانە ۇقشۇ ۇجىمدىق كۇشتەرىن ماتەريالدىق-تەحنيكالىق قامتاماسىز ەتۋ جۇيەسىن جەتىلدىرۋ ماسەلەلەرى توڭىرەگىندە پىكىر الماسىلدى.