اسىرەسە، اسكەرگە شاقىرۋ ناۋقانى ەرەكشە نازارعا الىنىپ وتىر.
كۇزگى شاقىرۋ ناۋقانى باستالىسىمەن، قورعانىس ءمينيسترىنىڭ تاپسىرماسى بويىنشا قورعانىس ۆەدومستۆوسىنىڭ ءاقپاراتتىق-تۇسىندىرۋ توبى ەل وڭىرلەرىندە جۇمىسقا كىرىستى، دەپ حابارلايدى Almaty-akshamy.kz.
«بۇل جۇمىستىڭ باستى باعىتتارى – پرەزيدەنتتىڭ جولداۋىن ءتۇسىندىرۋ، حالىق اراسىندا اسكەري قىزمەتتى ناسيحاتتاۋ، سونداي-اق «ءبىرتۇتاس ۇلت – ءبىرتۇتاس اسكەر» جاستاردى اسكەري-پاتريوتتىق تاربيەلەۋ باعدارلاماسىن ىسكە اسىرۋ»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
ءاقپاراتتىق-تۇسىندىرۋ توبى جۇمىسىن سەمەي جانە وسكەمەن وڭىرلەرىنەن باستادى. وبلىس ورتالىقتارىندا بۇل قىزمەتكە جەرگىلىكتى اتقارۋشى ورگاندار مەن قوعام، «انا جۇرەگى» ساربازدار انالارى بىرلەستىگىنىڭ وكىلدەرى، قارۋلى كۇشتەردىڭ ارداگەرلەرى جانە «جاس سارباز» رەسپۋبليكالىق اسكەري-پاتريوتتىق قوزعالىسىنىڭ بەلسەندىلەرى تارتىلدى.
قورعانىس ۆەدومستۆوسىنىڭ وكىلدەرى اسكەري قىزمەتشىلەرمەن، اسكەرگە شاقىرىلاتىن جانە شاقىرۋ جاسىنا دەيىنگى جاستارمەن كەزدەسۋ بارىسىندا مەملەكەت باسشىسىنىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» حالىققا جولداۋىنىڭ ەرەجەلەرىن ءتۇسىندىردى. پرەزيدەنت ايتقان باستى تەزيستەر اتاپ ءوتىلىپ، ولاردىڭ ەلدىڭ قارقىندى دامۋىنا جانە قازاقستاندىقتاردىڭ ءال-اۋقاتىن ارتتىرۋعا نەگىز بولاتىنى العا تارتىلدى.
اسىرەسە، اسكەرگە شاقىرۋ ناۋقانى ەرەكشە نازارعا الىنىپ وتىر. قورعانىس مينيسترلىگىنىڭ اسكەري قىزمەتشىلەرى مەرزىمدى اسكەري قىزمەت وتكەرۋدىڭ ەرەكشەلىكتەرى، اسكەري قىزمەتشىلەر مەن ولاردىڭ وتباسى مۇشەلەرى ءۇشىن الەۋمەتتىك كەپىلدىكتەر تۋرالى ايتىپ، اسكەرگە شاقىرىلۋشىلار مەن ولاردىڭ اتا-انالارىنىڭ سۇراقتارىنا جاۋاپ بەردى.
سونىمەن قاتار سەمەي مەن وسكەمەندە قورعانىس ۆەدومستۆوسى اباي جانە شىعىس قازاقستان وبلىستارىنان شاقىرىلعان، بۇگىندە ەلىمىزدىڭ ءتۇرلى وڭىرلەرىندە قىزمەت ەتىپ جاتقان مەرزىمدى قىزمەتتەگى ۇزدىك اسكەري قىزمەتشىلەردىڭ اتا-انالارىن سالتاناتتى ماراپاتتاۋ ءراسىمىن ۇيىمداستىردى. اتا-انالارعا وتان قورعايتىن لايىقتى ۇلدار تاربيەلەگەنى ءۇشىن العىس ايتىلدى، ال بولاشاق جاۋىنگەرلەرگە اتا-اناسىنىڭ جانە جەرلەستەرىنىڭ ماقتانىشى بولىڭدار دەگەن تىلەكتەر ءبىلدىرىلدى.
ودان بولەك «ءبىرتۇتاس ۇلت – ءبىرتۇتاس اسكەر» جاستاردى اسكەري-پاتريوتتىق تاربيەلەۋ باعدارلاماسىن ىسكە اسىرۋ شەڭبەرىندە جالپى ءبىلىم بەرەتىن مەكتەپتەردە قارۋلى كۇشتەردىڭ ارداگەرلەرى مەن اسكەري قىزمەتشىلەردىڭ قاتىسۋىمەن ەرلىك ساباقتارى وتكىزىلىپ، وسكەلەڭ ۇرپاقتى اسكەري وقۋ ورىندارىنا ءتۇسۋ تارتىبىمەن تانىستىرۋ ۇيىمداستىرىلدى. سونداي-اق وقۋشىلارعا ارناپ قارۋلى كۇشتەر تۋرالى دەرەكتى فيلمدەر جانە اسكەري جوعارى وقۋ ورىندارى جايلى بەينەروليكتەر كورسەتىلدى.
«ەل پرەزيدەنتى ءوز جولداۋىندا ەگەمەندىك پەن اۋماقتىق تۇتاستىقتى ساقتاۋ اسا ماڭىزدى مىندەت دەپ اتاپ وتكەن بولاتىن. ال مەملەكەتتى نىعايتۋ ءۇشىن بىزگە بىرلىك قاجەت. جاستارمەن قارىم-قاتىناس بارىسىندا وسكەلەڭ ۇرپاقتىڭ ادىلەتتى قازاقستاندى قۇرۋعا قانشالىقتى مۇددەلى ەكەنىن، وتاندى قورعاۋدى قاي دەڭگەيدە تۇسىنەتىنىن بايقاۋعا بولادى. سوندىقتان ءبىزدىڭ ءاقپاراتتىق-تۇسىندىرۋ توبىمىزدىڭ جۇمىسى قاجەت دەپ سانايمىن»، – دەدى قورعانىس مينيسترلىگى تاربيە جانە يدەولوگيالىق جۇمىستار دەپارتامەنتىنىڭ باستىعى، گەنەرال-مايور سەرىك بورامبايەۆ.
ءاقپاراتتىق-تۇسىندىرۋ توبىنىڭ جۇمىسى ۇلتتىق اسكەري-پاتريوتتىق ورتالىعىنىڭ باستىعى قازاقستاننىڭ ەڭبەك سىڭىرگەن قايراتكەرى ارمان اسەنوۆتىڭ باسشىلىعىمەن ۇيىمداستىرىلعان قارۋلى كۇشتەر ورتالىق ءانسامبلىنىڭ كونسەرتىمەن اياقتالدى.
