كۋرستىڭ اشىلۋ سالتاناتىنا «بۇۇ – ايەلدەر» وكىلى ماريا دوسەنكو قاتىستى
الماتىدا ق ر قم بىتىمگەرلىك وپەراسيالار ورتالىعى ۇلىبريتانيانىڭ قازاقستان رەسپۋبليكاسىنداعى ەلشىلىگىمەن بىرلەسىپ، «ادام قاۋىپسىزدىگى جانە گەندەرلىك ماسەلەلەر جونىندەگى كەڭەسشى» كۋرسىن وتكىزدى، دەپ حابارلايدى Almaty-akshamy.kz.
كۋرسقا قارۋلى كۇشتەردىڭ، ۇلتتىق ۇلاننىڭ، سونداي-اق ورتالىق ازيا ءوڭىرىنىڭ باسقا دا كۇشتىك ۆەدومستۆولارىنىڭ وكىلدەرى جينالدى. كۋرستىڭ اشىلۋ سالتاناتىنا «بۇۇ – ايەلدەر» وكىلى ماريا دوسەنكو قاتىستى. سونداي-اق قازاقستان رەسپۋبليكاسىنداعى ۇلىبريتانيانىڭ اسكەري اتتاشەسى، پودپولكوۆنيك روب باكستەر مەن «قورعاۋ-استانا» جەكە قورىنىڭ باسشىسى اننا رىل ءدارىس وقىدى.
ءىس-شارا بارىسىندا ق ر قم بىتىمگەرلىك وپەراسيالار ورتالىعى بىتىمگەرلىك دايىندىق باسقارماسىنىڭ وفيسەر-وقىتۋشىلارى ساباق جۇرگىزدى. كۋرستىڭ ماقساتى بۇۇ-نىڭ «ايەلدەر، بەيبىتشىلىك جانە قاۋىپسىزدىك» قارارىنىڭ نورمالارىن زەرتتەيتىن جانە قولداناتىن مامانداردى دايارلاۋ، قاتىسۋشىلاردى ازاماتتىق حالىقتى قورعاۋ قۇقىعىمەن جانە تۇجىرىمداماسىمەن تانىستىرۋ بولدى.
وقۋ اپتاسىنىڭ نەگىزگى بولىگى تىڭداۋشىلاردى ءتيىستى باسشىلىق قۇجاتتارمەن، اتاپ ايتقاندا، بۇۇ-نىڭ بەيبىتشىلىكتى قولداۋ وپەراسيالارىنداعى حالىقتىڭ وسال توپتارىن قورعاۋ تۇجىرىمداماسى مەن ستراتەگياسىمەن، اسكەري شەشىم قابىلداۋ پروسەسىندە ادام قاۋىپسىزدىگى جانە گەندەرلىك ماسەلەلەر جونىندەگى كەڭەسشىنىڭ رولىمەن تانىستىرۋعا باعىتتالدى. قارۋلى قاقتىعىس جاعدايىندا بالالاردى قورعاۋ، ۇكىمەتتىك ەمەس ۇيىمدارمەن جانە بۇۇ-نىڭ ايماقتىق كەڭسەلەرىمەن ۇيلەستىرۋ جۇمىستارىنا ەرەكشە نازار اۋدارىلدى.
كۋرس سوڭىندا قاتىسۋشىلارعا بۇرىن زەرتتەلگەن مودەلدەر نەگىزىندە ادام قاۋىپسىزدىگى جانە گەندەرلىك اسپەكتىلەر جونىندەگى كەڭەسشىنىڭ كوزقاراسى بويىنشا جەدەل جاعدايدى تالداۋعا ارنالعان بايانداما دايىنداۋعا ۋاقىت بەرىلدى. كۋرس سۇراق-جاۋاپ سەسسياسى تۇرىندەگى قورىتىندىلارمەن اياقتالىپ، شولۋلارعا قىسقاشا تالداۋ جاسالدى. شارانىڭ جابىلۋ سالتاناتىندا قاتىسۋشىلارعا سەرتيفيكاتتار تابىستالدى.