كورمەگە 20-عا جۋىق يننوۆاسيالىق جوبا قويىلدى
الماتىدا عىلىم اپتالىعى اياسىندا «عىلىم جانە بيزنەس: قازاقستاننىڭ يننوۆاسيالىق دامۋ جولدارى» اتتى عىلىمي-يننوۆاسيالىق كورمە ءوتتى، دەپ حابارلايدى Almaty-akshamy.kz.
عىلىمي جەتىستىكتەر كورمەسىن ق ر عىلىم جانە جوعارى ءبىلىم ءمينيسترى ساياسات نۇربەك، ق ر عىلىم اكادەمياسىنىڭ پرەزيدەنتى كۇنسۇلۋ زاكاريا، ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ، «اتامەكەن» ق ر ۇكپ باسقارما ءتوراعاسىنىڭ ءبىرىنشى ورىنباسارى ماقسات قيقىموۆ، الماتى قالاسى اكىمىنىڭ ورىنباسارى الىشەر ءابدىقادىروۆ، سونداي-اق بيزنەس جانە عىلىم وكىلدەرى، ءىرى كومپانيا باسشىلارى تاماشالادى.
كورمەگە نانوماتەريالدار نەگىزىندەگى قابىلداعىشتار، ەنەرگيا ۇنەمدەيتىن شامدار، فيزيكا بويىنشا باعدارلامالىق كەشەن، كومپوزيتتىك ماتەريالدار (شۋنگيت)، COVID-19 ۆيرۋستارىن جويۋعا ارنالعان دەربەس ءپورتاتيۆتى قۇرىلعى، ارنايى ماقساتتاعى پوليەفيرلى شايىرلاردىڭ تاجىريبەلىك ونەركاسىپتىك ءوندىرىسىن قۇرۋ، نانوسپۋتنيك جانە تاعى باسقا بارلىعى 20-عا جۋىق يننوۆاسيالىق جوبا قويىلدى.
جيىن بارىسىندا عىلىم جانە جوعارى ءبىلىم ءمينيسترى ساياسات نۇربەك عىلىمدى كوممەرسيالاۋدىڭ ماڭىزىن ايتىپ، وسى باعىتتا اتقارىلىپ جاتقان شارالاردى اتاپ ءوتتى.
«جەكە زاڭ، ۇلتتىق كەڭەس، مينيسترلىك قۇرىلدى، عىلىم اكادەمياسىن قايتا جۇكتەلۋدە، قارجىلاندىرۋ. زاڭنامالىق بازا بيىل اياقتالاتىن بولادى. ءبىز جارتى جىل بۇرىن ءسىز بەن ءبىز ايتقان بارلىق تەزيستەرىمىزگە وتە بايىپتى، قارىمدى كەلە جاتىرمىز. كوممەرسيالاندىرۋ – وتە اۋىر جۇمىس. مۇندا ەكسپەريمەنتتەر مەن ءمىنسىز مودەلدەۋدەن باسقا، ءبىز ۇيرەنىپ، بەيىمدەلۋىمىز قاجەت كوپتەگەن باسقا فاكتور بار»، – دەدى مينيستر.
ۇكپ وكىلدەرىنىڭ پىكىرىنشە، عىلىمي جوبالاردىڭ كوبىن كوممەرسيالاندىرىپ، نارىققا تاراتۋعا بولادى.
«بۇل عىلىمي ازىرلەمەلەردىڭ كوبى كوممەرسيالاندارىپ، ماسشتابتاۋعا بولاتىن جوبالار. عىلىم مەن بيزنەس يننوۆاسيالىق الەۋەتتى دامىتۋدىڭ ەكى ماڭىزدى قۇرامداس بولىگى ەكەنىن تولىق قولدايمىز. ءتيىمدى ىسكە اسىرۋ ارقىلى وسى ەكى سەكتور اراسىنداعى ىنتىماقتاستىق كۇردەلى ەكونوميكالىق جانە الەۋمەتتىك ماسەلەلەردى شەشۋگە، ەكونوميكانىڭ وسۋىنە جانە جاڭا جۇمىس ورىندارىن قۇرۋعا كومەكتەسەدى»، – دەدى ماقسات قيقىموۆ.
سپيكەر ۇلتتىق پالاتا جانە بيزنەس وكىلدەرىنىڭ باستاماسىمەن عىلىم كوميتەتى جانىنان كوممەرسيالاندىرۋ جونىندەگى جەكە ۇلتتىق عىلىمي كەڭەس قۇرىلعانىن ايتتى. ۇكپ ۇسىنىسى بويىنشا 12-دەن استام قاۋىمداستىق، سونداي-اق بيزنەستىڭ 28 وكىلى 10 ۇلتتىق عىلىمي كەڭەستىڭ قۇرامىنا ەنگىزىلدى. بۇل ءقازىردىڭ وزىندە عىلىمي جانە بيزنەس توپتاردىڭ ءوزارا ءىس-قيمىلىنىڭ بەلگىلى ءبىر ناتيجەلەرىن بەرەدى.
ماقسات قيقىموۆ ۇكىمەت عىلىمدى قارجىلاندىرۋدى 2020 جىلى 89 ملرد تەڭگەدەن وسى جىلى 160 ملرد تەڭگەگە، ال 2025 جىلعا قاراي 240 ملرد تەڭگەگە دەيىن ۇلعايتۋدى جوسپارلاپ وتىرعانىن اتاپ ءوتتى. بۇل مەملەكەت تەك وسى باعىتتاعى دامۋ قارقىنىن ارتتىراتىندىعىن كورسەتەدى.
ەسكە سالساق، ۇلتتىق پالاتا جانە بيزنەس وكىلدەرىنىڭ باستاماسىمەن عىلىم كوميتەتى جانىنان كوممەرسيالاندىرۋ جونىندەگى جەكە ۇلتتىق عىلىمي كەڭەس قۇرىلدى. سونداي-اق عىلىمنىڭ بيزنەسپەن ءوزارا ءىس-قيمىلىنا جاعداي جاساۋ ماقساتىندا عىلىم قورىنىڭ بيزنەس-سەرىكتەستەر كلۋبى عىلىمي جوبالاردى كوممەرسيالاندىرۋعا مۇددەلى بيزنەس وكىلدەرىنىڭ قاۋىمداستىعى قۇرىلدى. قازىرگى ۋاقىتتا كلۋبقا 180-دەن استام مۇشە كىردى.