بۇل شاراعا ەڭ مىقتى مينااتقىش ەسەپتوپتارى قاتىسادى.
قازاقستان اسكەريلەرى ارميا حالىقارالىق ويىندارىنا دايىندىق جۇمىستارىن باستادى. بۇل شارا اقپان ايىنىڭ سوڭىندا اياقتالادى، دەپ حابارلايدى Almaty-akshamy.kz.
«قارۋلى كۇشتەردە 2022 جىلعى ارميا حالىقارالىق ويىندارىنا دايىندىق باستالدى. پوليگونداردا «ارتيللەريادان وق اتۋ شەبەرلەرى» كونكۋرسىنا قازاقستان كومانداسىنىڭ قۇرامىنا كىرەتىن اسكەري قىزمەتشىلەردى ىرىكتەۋ ءجۇرىپ جاتىر»، - دەلىنگەن قورعانىس مينيسترلىگىنىڭ حابارلاماسىندا.
مامانداردىڭ ايتۋىنشا، بايقاۋعا ەڭ مىقتى مينااتقىش ەسەپتوپتارى قاتىسادى.
«كىل مىقتى اسكەري قىزمەتشىلەردى ىرىكتەۋ بارلىق كانديداتتاردىڭ نورماتيۆتەردى تاپسىرۋداعى كاسىبي دەڭگەيىن جان-جاقتى باعالاي وتىرىپ، مۇقيات جۇرگىزىلەتىن بولادى»، – دەدى «وڭتۇستىك» وڭىرلىك قولباسشىلىعىنىڭ ارتيللەريا جانە زىمىران اسكەرلەرىنىڭ باستىعى، پولكوۆنيك تىلەك سەرىكپايەۆ.
بارلىق وڭىرلىك قولباسشىلىقتاردىڭ، دەسانتتىق-شابۋىلداۋ اسكەرلەرىنىڭ مينااتقىش بولىمشەلەرىن قامتيتىن ىرىكتەۋ كەزەڭى اقپان ايىنىڭ سوڭىندا اياقتالادى. ءساۋىردىڭ ورتاسىندا «ءماتىبۇلاق» پوليگونىندا ارتيللەريستەر كونكۋرس كەزەڭدەرىنىڭ ەرەكشەلىكتەرىنە قاراي دالالىق جورىققا شىعۋ ساباقتارىن جالعاستىرادى.
«ارتيللەريادان وق اتۋ شەبەرلەرى» كونكۋرسى 2016 جىلدان بەرى قازاقستاندا تۇراقتى تۇردە وتكىزىلىپ كەلەدى. ەل قارۋلى كۇشتەرىنىڭ كومانداسى بۇل سايىستا جەڭىس تۇعىرىنان تۇسكەن ەمەس.
ارميا حالىقارالىق ويىندارى – حالىقارالىق اسكەري ىنتىماقتاستىق، تاجىريبە الماسۋ شاراسى عانا ەمەس، سونداي-اق جاۋىنگەرلىك دايارلىقتىڭ جاڭا فورماتىندا اسكەري قىزمەتشىلەردىڭ شەبەرلىگىن ارتتىرۋدىڭ ءتيىمدى قۇرالى. جاۋىنگەرلىك ماشىقتى جەتىلدىرۋ كونكۋرستارعا دايىندىق بارىسىندا جانە ونىڭ وتكىزۋ كەزىندەگى جارىستاردا عانا ەمەس، وقۋ-جاۋىنگەرلىك ءىس-قيمىلدار دا قاجەت.
2021 جىلى ارميا حالىقارالىق ويىندارىنىڭ باعدارلاماسىنا 11 مەملەكەتتىڭ اۋماعىندا وتكەن دالالىق، اۋە جانە تەڭىز ماشىعى بويىنشا 34 كونكۋرس كىردى. قىرىقتان استام ەلدىڭ اسكەري قىزمەتشىلەرى باعىن سىناعان سايىستاردىڭ 11-ىنە قاتىسقان قازاقستان قارۋلى كۇشتەرىنىڭ قورجىنىندا ەكى التىن، ءبىر كۇمىس جانە سەگىز قولا مەدال بار.