ولار تاباندىلىق تانىتىپ، شىدامدىلىقتارىن شىڭدادى.
قازاقستان قارۋلى كۇشتەرىنىڭ تاۋداعى دايارلىق ورتالىعىندا الپىلىك جانە بارلاۋ بولىمشەلەرى اسكەري قىزمەتشىلەرىمەن وقۋ-ادىستەمەلىك جيىندار ءوتتى، دەپ حابارلايدى Almaty-akshamy.kz.
«قارۋلى كۇشتەردە جاۋىنگەرلىك وقۋ شارالارى مەملەكەت باسشىسىنىڭ اسكەردىڭ جاۋىنگەرلىك قابىلەتىن تۇبەگەيلى ارتتىرۋ جونىندەگى تاپسىرماسىن ىسكە اسىرۋ شەڭبەرىندە جۇرگىزىلۋ ۇستىندە»،- دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
جيىننىڭ نەگىزگى ماقساتى – تاۋ كەدەرگىلەرىن ەڭسەرۋ ماشىقتارىن جەتىلدىرۋ، بيىك تاۋلاردا كۇردەلى جاعدايدا جاۋىنگەرلىك ءىس-قيمىلدار جۇرگىزۋدىڭ تاكتيكالىق ادىستەرى مەن تاسىلدەرىن ورىنداۋ.
وسىنداي ساباقتار بارىسىندا جەكە قۇرام تاۋداعى دايارلىق دەڭگەيىن جەتىلدىرىپ قانا قويماي، وقۋ-جاۋىنگەرلىك تاپسىرمالاردى ورىنداۋ كەزىندە توزىمدىلىكتى، شىدامدىلىق پەن تاباندىلىقتى نىعايتادى.
ءبىرقاتار اسكەري قىزمەتشىلەر تاۋ دايارلىعىنان نۇسقاۋشى رەتىندە بىلىكتىلىگىن ارتتىرىپ، الپينيزم بويىنشا ءۇشىنشى جانە ەكىنشى رازريادتاردىڭ نورماتيۆتەرىن ورىندادى.
جيىندى قورىتىندىلاعان ارنايى وپەراسيالار كۇشتەرىنىڭ قولباسشىسى، پولكوۆنيك بولات جورابايەۆ جەكە قۇرامنىڭ وقۋ باعدارلاماسىن ءساتتى ورىنداعانىن اتاپ ءوتىپ، اسكەري الپينيستەرگە سەرتيفيكاتتار مەن توسبەلگىلەردى تابىس ەتتى.
