"ايەلدەر ايەلدەرگە" الەۋمەتتىك جوباسى
"ايەلدەر ايەلدەرگە" الەۋمەتتىك جوباسى 2023 جىلى الماتى قالاسىندا باستاۋ الدى. بۇل جوبا اياسىندا 22 ەرەكشە بالانىڭ اناسى جەكە كاسىپ اشۋعا تەگىن كومەك الدى. سودان سوڭ جوبا رەسپۋبليكالىق دەڭگەيگە جەتىپ، ءقازىر ول تەك الماتى قالاسىندا ەمەس، سونداي-اق استانا، شىمكەنت، وسكەمەن، قوستاناي قالالارىندا دا وتەدى.
جوبانىڭ ماقساتى - ەرەكشە بالالاردىڭ انالارىنا كومەكتەسۋ. ولارعا ءوز ءىسىن/بيزنەسىن اشۋدى ۇيرەتۋ جانە جۇمىسقا ورنالاستىرۋ. الەۋمەتتىك جوبا ق ر پرەزيدەنتى جانىنداعى ايەل ءىسى جانە وتباسى-دەموگرافيالىق ساياساتىنىڭ ۇلتتىق كوميسسياسىنىڭ جانە ق ر مادەنيەت جانە اقپارات مينيسترلىگىنىڭ قولداۋىمەن جۇزەگە اسادى.
جوبا قالاي ىسكە اسىرىلادى؟
جوباعا قاتىسۋشىلاردى ىرىكتەۋ، ولارعا كاسىپكەرلىك نەگىزدەردى ۇيرەتۋ، پسيحولوگيالىق قولداۋ - MamaPro قب؛
3 اي بويى مەنتور بولۋ - ادجك، ەقدب، "اتامەكەن" ۇلتتىق پالاتاسى؛
بيزنەس يەلەرىنىڭ ماستەر-كلاستارى جانە زاڭگەر كەڭەستەرى - ادجك؛
سۇرانىس بولسا، پسيحولوگيالىق قولداۋ - ادجك؛
كوۋچينگ - ICF Kazakhstan حالىقارالىق كوۋچتار قورى؛
بيزنەستى قولداۋ جونىندەگى مەملەكەتتىك باعدارلامالارعا قاتىسۋ مۇمكىندىكتەرى بويىنشا كونسۋلتاسيالار - مەملەكەتتىك ورگاندار.
IT-Aiel جوباسى
Astana Hub قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيامەن بىرلەسىپ، IT سالاسىندا جۇمىس ىستەگىسى كەلەتىن ايەلدەردى وقىتادى.
جوبانىڭ ماقساتى - ايەلدەردىڭ ەكونوميكالىق مۇمكىندىكتەرىن كەڭەيتۋ جانە ناتيجەلى جۇمىسپەن قامتۋعا تارتۋ، ولاردىڭ تابىسىن ارتتىرۋعا جاعداي جاساۋ، ايەلدەردىڭ سيفرلىق قۇزىرەتىن دامىتۋ.
18 جاستان اسقان جۇمىسسىز جانە دەكرەتتىك دەمالىستاعى ايەلدەر IT-Aiel باعدارلاماسىنا قاتىسۋعا ءوتىنىش بەرىپ، No Code School، Freelance School، سونداي-اق نەگىزگى كومپيۋتەرلىك ساۋاتتىلىق كۋرستارى بويىنشا وقي الادى. قاتىسۋشىلار جاڭا ءىستى ونلاين فورماتتا قازاق جانە ورىس تىلدەرىندە يگەرە الادى. باعدارلاما قىزىقتى ۆەبينارلار، ۆوركشوپتار، تىكەلەي ەفيرلەر، Q&A-سەسسيالارى جانە ت.ب. تۇرادى.
IT-Aiel جوباسىنىڭ ىسكە اسىرىلۋىنا قاتىستى اقپاراتتى @astanahub/@technowomenkz اككاۋنتتارىنان تابا الاسىز.
Tomiris ءبىلىم بەرۋ جوباسى
Tomiris باعدارلاماسى قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسياسىنىڭ جانە "امانات" پارتياسىنىڭ ساياسي مەنەدجمەنت اكادەمياسىنىڭ قولداۋىمەن وتكىزىلەدى. جوبا قىز-كەلىنشەكتەردىڭ ەلدىڭ ساياسي-ەكونوميكالىق ومىرىنە ارالاسۋىنا جول اشادى.
بۇل باعدارلاما بويىنشا 30 ايەل ءبىلىم الادى. ايەلدەر جوباعا كونكۋرستىق كوميسسيانىڭ ىرىكتەۋىنەن وتەدى. قىز-كەلىنشەكتەر كوپشىلىك الدىندا سويلەۋدى، قارىم-قاتىناس ورناتۋدى، ەموسيونالدى ينتەللەكتىنى دامىتۋدى جانە جوبالاردى باسقارۋدى ۇيرەنەدى. وقۋ باعدارلاماسى 5 كۇنگە سوزىلادى.
"ميكروبيزنەستەگى ايەلدەر" جوباسى
"ميكروبيزنەستەگى ايەلدەر" - ق ر ۇكىمەتىنىڭ قارجىلىق قولداۋىمەن "دامۋ" قورىنىڭ سەرىكتەسى – ەقدب ۇيىمداستىرعان تەگىن ءبىلىم بەرۋ جوباسى.
جوبا ماقساتى:
بيزنەستى ماسشتابتاۋ جانە ونى كەلەسى دەڭگەيگە كوتەرۋ؛
زاماناۋي باسقارۋ قۇرالدارىن مەڭگەرۋ؛
سەرىكتەستىك جەلىنى كەڭەيتۋ جانە پىكىرلەس ادامدار تابۋ؛
جۇمىس توبىن كۇشەيتۋ؛
ىسكەرلىك ويلاۋدى دامىتۋ؛
مىقتى جانە سەنىمدى كوشباسشى بولۋدى ۇيرەنۋ.
وقىتۋ باعدارلاماسى بيزنەستىڭ بارلىق سالالارىن قامتيدى جانە قازاق جانە ورىس تىلدەرىندە وتەدى.
جوباعا 15 ادامنان اسپايتىن قىزمەتكەرى بار ميكروبيزنەس يەسى قاتىسا الادى. بيزنەسىڭىزدىڭ جىلدىق اينالىمى جىلىنا 100 ملن تەڭگەدەن اسپاۋى كەرەك. جوباعا بانك نەمەسە قارجى قىزمەتتەرى، اسكەري ونىمدەر/قىزمەتتەر، ويىن جانە تەمەكى ءوندىرىسى سالالارىنداعى كومپانيالار قاتىسا المايدى.
كوپبالالى انالارعا ارنالعان جەڭىلدىكتەر
ەلىمىزدە 4 جانە ودان دا كوپ كامەلەت جاسىنا تولماعان بالاسى بار وتباسىلار بىردەن كوپبالالىلار ساناتىنا جاتقىزىلادى. التى بالا تۋعان كوپبالالى انالارعا "كۇمىس القا"، ال جەتى نە ودان كوپ بالا تۋعان كوپبالالى انالارعا "التىن القا" بەرىلەدى.
الەۋمەتتىك باسپانا
"التىن القا"، "كۇمىس القا" القالارىمەن ماراپاتتالعان نەمەسە بۇرىن "باتىر انا" اتاعىن العان، ءى جانە ءىى دارەجەلى "انا داڭقى" وردەندەرىمەن ماراپاتتالعان كوپبالالى انالار تۇرعىن ءۇيدى مەملەكەتتىك تۇرعىن ءۇي قورىنان الۋعا نەمەسە جەرگىلىكتى اتقارۋشى ورگان جەكە تۇرعىن ءۇي قورىنان جالداعان تۇرعىن ءۇيدى الۋعا ءبىرىنشى كەزەكتە قۇقىلى. ياعني كوپبالالى انالار تۇرعىن ءۇي كەزەگىنە تۇرىپ، باسپانا الا الادى.
سالىق جەڭىلدىگى
"التىن القا" القاسىمەن ماراپاتتالعان جانە "باتىر انا" اتاعىنا يە بولعان كوپبالالى انالار تۇرعىن ءۇي قورى يەلەنگەن جەر ۋچاسكەلەرى، ونىڭ ىشىندە ونىڭ جانىنداعى قۇرىلىستار، ءۇي جانىنداعى جەر ۋچاسكەلەرى بويىنشا سالىقتان بوساتىلادى.
سونداي-اق "باتىر انا"، "التىن القا" نە "كۇمiس القامەن" ناگرادتالعان كوپبالالى انالار ءبىر كولىكتىڭ سالىعىن تولەۋدەن بوساتىلادى. ولار نوتاريالدىق قىزمەتتەرگە جۇگىنگەندە مەملەكەتتىك باج سالىعىن تولەمەيدى.
قوعامدىق كولىكتە تەگىن ءجۇرۋ
2023 جىلدىڭ 1 ناۋرىزىنان باستاپ "اۆتوموبيل كولىگى تۋرالى" زاڭعا وزگەرىستەر ەنگىزىلدى. زاڭعا سايكەس "التىن القا"، "كۇمىس القا" القالارىمەن ناگرادتالعان نەمەسە بۇرىن "باتىر انا" اتاعىن العان، سونداي-اق I جانە II دارەجەلى "انا داڭقى" وردەندەرىمەن ناگرادتالعان كوپبالالى انالاردىڭ تەگىن جول جۇرۋگە قۇقىعى بار.
زەينەتكە ەرتە شىعۋ
قازىرگى زاڭناماعا سايكەس ەرلەر ءۇشىن زەينەتكە شىعۋ جاسى - 63 جاس، ايەلدەر ءۇشىن - 60 جاس دەپ بەلگىلەنگەن. ال 5 جانە ودان دا كوپ بالا تۋعان (اسىراپ العان) جانە ولاردى 8 جاسقا دەيىن تاربيەلەگەن ايەلدەردىڭ 53 جاسقا تولعاندا جاسىنا بايلانىستى زەينەتاقى تولەمدەرىن الۋعا قۇقىعى بار.
جالعىزباستى انالارعا قانداي كومەكتەر قاراستىرىلعان؟
جالعىزباستى انا - زاڭدى نەكەگە تۇرماي، دۇنيەگە ءسابي اكەلگەن ايەل جانە ولارعا اليمەنت تولەنبەيدى. ال كۇيەۋىمەن اجىراسقان نەمەسە جولداسى قايتىس بولعان، بالالارى بار انالار تولىق ەمەس وتباسى ساناتىنا كىرەدى. جالعىزباستى انالارعا جانە تولىق ەمەس وتباسى ساناتىنداعى وتباسىلارعا مەملەكەت تاراپىنان مىناداي جەڭىلدىك تۇرلەرى قاراستىرىلعان:
جالعىزباستى انالار حالىقتىڭ الەۋمەتتىك جاعىنان ءالسىز توپ مۇشەسى رەتىندە مەملەكەتتiك تۇرعىن ءۇي قورىنان تۇرعىن ءۇي كەزەگiنە تۇرا الادى.
جالعىزباستى انالار بالا تۋۋىنا بايلانىستى تاعايىندالاتىن بiرجولعى مەملەكەتتىك جاردەماقى، بالا بiر جاسقا تولعانعا دەيiن ونىڭ كۇتiمiنە بايلانىستى تولەنەتiن اي سايىنعى مەملەكەتتىك جاردەماقى الا الادى.
جالعىزباستى انا كوپبالالى انا بولسا، بالاباقشا كەزەگىن ەرتەرەك الۋىنا بولادى.