بيىل پاريجدە وتكەن وليمپياداداعى جەتى مەدالدىڭ تورتەۋىن ارميا ورتالىق سپورت كلۋبىنىڭ وكىلدەرى ەنشىلەگەن بولاتىن.
قورعانىس ءمينيسترى رۋسلان جاقسىلىقوۆ ارميا سپورتشىلارىن ماراپاتتادى، دەپ حابارلايدى aqshamnews.kz
بيىل ارميا سپورتشىلارى عۇسمان قىرعىزبايەۆ، يسلام ساتبايەۆ، دەمەۋ جادىرايەۆ جانە ناريمان قۇربانوۆ ەلىمىزدى الەمگە ايگىلى ەتتى.
گەنەرال-پولكوۆنيك رۋسلان جاقسىلىقوۆ CISM حالىقارالىق اسكەري-سپورتتىق ۇيىمىمەن بايلانىستىڭ قايتا جاندانۋىن وڭ باعالاپ، كەلەسى جىلى ول باسقارمادان بىزگە ءبىر ورىن بەرىلەتىنىن مالىمدەدى.
"ەكى جىل قاتارىنان اسكەري قىزمەتشىلەرىمىز رەسپۋبليكالىق «قازاقستان بارىسى» تۋرنيرىندە جەڭىسكە جەتتى. كەلەسى جىلى اوسك شەڭبەرىندە ءبىز وسى سپورت تۇرىنەن الەم چەمپيوناتىن وتكىزەمىز. وعان قوسا، جوعارعى باس قولباسشى اسكەري سپورت كوللەدجىن قۇرۋ تۋرالى شەشىمىمىزدى قولدادى. بۇل قارۋلى كۇشتەر ءۇشىن دە، مەملەكەتىمىز ءۇشىن دە سپورتتى دامىتۋدىڭ تاعى ءبىر قادامى. جاستاردىڭ لايىقتى ءبىلىم الۋى جانە بولاشاقتا سپورتتا جوعارى جەتىستىكتەرگە جەتىپ، ءوز الەۋەتىن ىسكە اسىرۋى ءۇشىن جاعداي جاسايمىز"، – دەپ اتاپ ءوتتى مينيستر.
قورعانىس ۆەدومستۆوسىنىڭ باسشىسى اوسك باسشىلىعىنىڭ الدىنا ءبىرقاتار مىندەت قويدى. ولاردىڭ قاتارىندا قازاق كۇرەسى، سامبو، جاۋىنگەرلىك سامبو جانە رەگبيدى دامىتۋ دا بار. گەنەرال-پولكوۆنيك رۋسلان جاقسىلىقوۆ بۇدان بولەك ۇلى وتان سوعىسىنداعى جەڭىستىڭ 80 جىلدىعىنا جانە كەڭەس وداعىنىڭ باتىرى ءاليا مولداعۇلوۆانىڭ تۋعانىنا 100 جىل تولۋىنا ارنالعان سپورتتىق ءىس-شارالاردى ساپالى ۇيىمداستىرۋ قاجەتتىگىنە دە توقتالدى.
كەزدەسۋ سوڭىندا قورعانىس ءمينيسترى اوسك سپورتشىلارىن، كوماندا باستىقتارىن، جاتتىقتىرۋشىلار مەن سپورت روتاسىنىڭ اسكەري قىزمەتشىلەرىن ماراپاتتادى. «ەل قورعانى» مەدالى اعا لەيتەنانت مارات بايقامۇروۆقا، قارۋلى كۇشتەردىڭ قىزمەتكەرى ناريمان قۇربانوۆقا، ەفرەيتور نۇرقوجا قايپانوۆقا، كىشى سەرجانت ءجاميلا باقبەرگەنوۆاعا جانە كاپيتان زامزاگۇل فايزولانوۆاعا تابىستالدى. «قازاقستان رەسپۋبليكاسى قارۋلى كۇشتەرىنىڭ ۇزدىگى» بەلگىسىنە قاتارداعى جاۋىنگەرلەر اسان ءسالىموۆ، ابدۋللا مۋسين، ءالىمحان سىزدىقوۆ، ەفرەيتور مەيىرجان ءاشىروۆ جانە قارۋلى كۇشتەردىڭ قىزمەتكەرى كاميل كۋرۋگلييەۆ يە بولدى. قارۋلى كۇشتەردىڭ قىزمەتكەرى انگەلينا لۋكاس ءمينيستردىڭ گراموتاسىن الدى، ال اتاۋلى ساعاتتار – پودپولكوۆنيك اتاحان نۇريدينوۆكە، لەيتەنانت اسان مامبەتقۇلوۆقا، كاپيتان عۇمار قىرعىزبايەۆقا، قارۋلى كۇشتەردىڭ قىزمەتكەرلەرى كامال گادجيماگومەدوۆكە پەن نۇرىم دۇيسەنوۆكە بەرىلدى.
وقۋ-ادىستەمەلىك جيىن اياسىندا قارۋلى كۇشتەر تۇرلەرىنىڭ، اسكەر تەكتەرى مەن جوعارى وقۋ ورىندارىنىڭ دەنە شىنىقتىرۋ دايارلىعى جانە سپورت ماماندارىنىڭ قىزمەتىنىڭ قورىتىندىسى شىعارىلدى.